Саха сирин муниципальнай тэриллиилэрин бэрэстэбиитэллээх уорганнарын дьокутааттарын I сийиэстэрэ кулун тутар 29—30 күннэригэр Дьокуускайга буолар. Бу тэрээһини ыытар туһунан Ил Түмэн бэрэссэдээтэлэ Александр Жирков анал уурааҕа ааспыт сыл сэтинньигэр тахсан турар.
Роман Попов, “Саха сирэ” хаһыат, https://edersaas.ru
Сийиэскэ бары улуустар, куораттааҕы уокуруктар оройуоннааҕы, нэһилиэктээҕи сэбиэттэрин дьокутааттара – барыта 500 делегат – кыттыахтара.
Сийиэс үлэтигэр 150 ыҥырыылаах ыалдьыт – Федерация Сэбиэтин сенатордара, Судаарыстыбаннай Дуума дьокутааттара, регион бырабыыталыстыбаларын чилиэннэрэ, СӨ Конституционнай Суутун судьуйалара, федеральнай, өрөспүүбүлүкэтээҕи ситэриилээх былаас бэрэстэбиитэллэрэ, улуус, куораттааҕы уокурук баһылыктара, Саха сирин муниципальнай тэриллиилэрин сэбиэттэрин, өрөспүүбүлүкэ олохтоох салайыныытын бэрэстэбиитэллээх уорганнарын ассоциациятын бэрэстэбиитэллэрэ, о.д.а. кыттыахтара.
Сийиэс делегаттара “Саха Өрөспүүбүлүкэтигэр олохтоох салайыныы бэрэстэбиитэллээх уорганын дьокутаатын статуһун туһунан” Саха Өрөспүүбүлүкэтин сокуонун барылын, “Арассыыйа Федерациятын сокуону таһаарыы сорох аакталарыгар көннөрүүлэри киллэрии туһунан” федеральнай сокуону, “Арассыыйа Федерациятыгар олохтоох салайыныы тэрилтэлэрин уопсай бириинсиптэрин туһунан” федеральнай сокуоҥҥа уларытыылары, көннөрүүлэри киллэриини дьүүллэһиэхтэрэ.
431 олохтоох салайыныы бэрэстэбиитэллээх уоргана бүгүн Саха сиригэр баар:
- 34 дьокутааттар оройуоннааҕы сэбиэттэрэ, икки куораттааҕы уокурук бэрэстэбиитэллээх уоргана,
- 48 дьокутааттар куораттааҕы сэбиэттэрэ,
- 347 нэһилиэктэр бэрэстэбиитэллээх уорганнара.
Үрдүк таһымнаах тэрээһин чэрчитинэн үс семинар, үс “төгүрүк остуол” ыытыллаллара былааннанар.
“Бэрэстэбиитэллээх уорганнар үлэлэрин-хамнастарын тэрийии боппуруостара” диэн тиэмэҕэ улахан кэпсэтии тахсара күүтүллэр. Ити кэпсэтиигэ 210 делегат кыттара сабаҕаланар.
Кулун тутар 29 күнүгэр Юрий Николаев бэрэссэдээтэллээх бүддьүөккэ, нолуокка, уонна сыана бэлиитикэтигэр, бас билии боппуруостарыгар, приватизацияҕа сис кэмитиэт Ил Түмэҥҥэ “Муниципальнай баайы-дуолу, үбү көдьүүстээхтик салайыыга бэрэстэбиитэллээх уорганнар кыттыылара уонна оруоллара” тиэмэҕэ семинары тэрийэн ыытыаҕа.
Ил Түмэн мандакка, регламеҥҥа хамыыһыйатын бэрэссэдээтэлэ Марфа Филиппова “Дьокутаат этиката уонна регламент боппуруостара” тиэмэҕэ “төгүрүк остуол” ыытылларын иһитиннэрдэ. Онно 90 делегат кыттыаҕа диэн буолар. Кэпсэтиигэ Дьокуускай куораттааҕы Дууматын, Мииринэй, Нерюнгри оройуоннаҕы сэбиэттэрн дьокутааттара үлэ уопутун үллэстиэхтэрэ.
Маны тэҥэ муниципальнай тэриллиилэр бэрэстэбиитэллээх уорганнарын дьокутааттарын I сийиэһин чэрчитинэн, бэрэстэбиитэллээх уорганнар үлэлэрин-хамнастарын сүрүн хайасхатыгар — нуорманы олохтооһуҥҥа семинар, бэрэстэбиитэллээх уорганнар уопсастыбаннай тэрилтэлэри кытта бииргэ үлэлээһиннэрин боппуруостарыгар “төгүрүк остуол” ыытыллыахтара. Олорго 160-нуу делегат сылдьара былааннанар.
4 890 дьокутаат, 2015 сыл балаҕан ыйын 1 күнүнээҕи туругунан, өрөспүүбүлүкэҕэ олохтоох салайыныы
бэрэстэбиитэллээх уорганнарыгар баара.
Саха сирин бэрэстэбиитэллээх уоганнарын дьокутааттарын I сийиэһин сүрүн соругунан баар кыһалҕалары бэлиэтээн, муниципальнай тэриллиилэр бэрэстэбиитэллээх уорганнарын үлэлэрин-хамнастарын тупсарыы буолар. Тэрээһин бастыҥ үлэлээх оройуоннааҕы сэбиэттэр, нэһилиэктэр бэрэстэбиитэллээх уорганнарын быһаарыаҕа.
Роман Попов, “Саха сирэ” хаһыат, https://edersaas.ru