Ил Түмэн Бэрэссэдээтэлэ Петр Гоголев салайааччылаах норуот дьокутааттарын бөлөҕө бу күннэргэ Бүлүү эргин улуустарга үлэлиир.
edersaas.ru.
— Билигин тыа сирин территорияларын сайыннарыыга федеральнай бырагыраама бырайыага оҥоһулла сылдьар. Урукку өттүгэр тыа сирин территорияларын сайыннарыы атын бырагыраамаларга хос бырагыраама быһыытынан сылдьыбыт буоллаҕына, билигин бэйэтэ туспа федеральнай бырагыраама быһыытынан үлэлиэҕэ. Биһиги, дьокутааттар, бу үлэҕэ көхтөөхтүк кыттыахтаахпыт, бырайыагы дьүүллэһиигэ, тыын суолталаах боппуруостары көтөҕүүгэ санаабытын иһитиннэриэх тустаахпыт, – диэн Петр Гоголев спикеринэн талылларыгар этэн турар.
Тылтан дьыалаҕа киирэн, Петр Гоголев норуот дьокутааттарын улахан бөлөҕүн салайан, бу күннэргэ Бүлүү эргин улуустарга үлэлии сылдьар. Оробуочай бөлөх састаабыгар дьокутааттар Феодосия Габышева, Владимир Прокопьев, Яков Ефимов, Владимир Чичигинаров, Андрей Николаев, Семен Березин, Ньургуйаана Захарова уонна биэдэмистибэлэр бэрэстэбиитэллэрэ бааллар. Үлэ бастакы күнэ, тохсунньу 19 күнүгэр, Ньурба куоратыгар биллиилээх судаарыстыбаннай үлэһит Степан Васильев пааматынньыгар сибэкки дьөрбөтүн уурууттан саҕаланна. Дьокутааттар салгыы инбэлиит уонна доруобуйаларын туругунан хааччахтаах оҕолору реабилитациялыыр кииҥҥэ, К.Уткин аатынан мусуойга сырыттылар. Бүгүн уонна сарсын, ол эбэтэр тохсунньу 20-21 күннэригэр, Сунтаар улууһугар, тохсунньу 22 күнүгэр Үөһээ Бүлүү улууһугар, тохсунньу 23 күнүгэр Бүлүү улууһугар үлэлиэхтэрэ. Хас улуус ахсын дьокутааттар социальнай эбийиэктэргэ итиэннэ тыа хаһаайыстыбатын тэрилтэлэригэр сылдьыахтара, улуус дьаһалтатын, нэһилиэктэр баһылыктарын, дьокутааттарын кытары көрсөн, тустаах улуустар социальнай-экономическэй сайдыытын боппуруостарын тула кэпсэтиэхтэрэ, этиилэри хомуйуохтара.
Итинэн өрөспүүбүлүкэ парламена аһаҕас буолуу принцибин олоххо киллэрэр итиэннэ тирээн турар боппуруостары дьүүллэһиигэ саҥа былаһааккалары арыйар үлэтин күүһүрдэр. Быйылгы 2019 сыл устата норуот дьокутааттара өрөспүүбүлүкэ бары улуустарыгар сылдьан, үлэни-хамнаһы миэстэҕэ билсэр, үлэ кэлэктииптэрин көрсөр санаалаахтар диэн Ил Түмэн пресс-сулууспата иһитиннэрэр.
Раиса Сибирякова, «Саха сирэ» edersaas.ru.
Хаартыскаҕа Василий Кононов түһэриитэ.