Бүлүү улууһун уонна куорат Сэбиэтин дьокутааттара Александр Григорьев, Валентин Иванов, Марианна Спиридонова, Саргылана Кузьмина түмсүүлээхтик үлэлээн, Бүлүү куорат хоту өттүгэр олорор ыаллары уунан хааччыйдылар.
edersaas.ru
Дьон хаһаайыстыбаҕа, оҕуруокка туттарга ууга наадыйар кыһалҕаларын быһаарыыга үлэлэһэр дьокутааттар бу күннэргэ элбэх махтал тылларын иһиттилэр, өссө да истиэхтэрэ турдаҕа. Истэллэрэ оруннаах. Былырыын куорат хотугу түөлбэтигэр сайыҥҥы уу ситимин үлэлэппит ОДьКХ СУТ Бүлүүтээҕи салаата ситимҥэ элбэх тэстии баарынан, ууну тиэрдии ороскуота үрдүгүнэн, төлөбүр ситэ киирбэтинэн быйыл аккаастанарын биллэрбитигэр, дьокутааттар ыаллары сайын уунан хааччыйарга үлэлэстилэр.
Улуус Сэбиэтин дьокутаата Александр Григорьев:
— ОДьКХ СУТ Бүлүүтээҕи салаата элбэх ороскуоту көрсөн, сайыҥҥы уу ситимин урбаанньыттарга биэрэн үлэлэтэр былааннааҕа эрээри, барыһа суох дьыалаҕа ылсар урбаанньыт көстүбэтэҕэ. Ситим баарын үрдүнэн дьон хайдах уута суох олоруой? Саатар ууну туттуу тарыыба үрдүк баҕайы этэ. Кэпсэтэн, сыананы түһэрсэн, быйыл сайын биир ыал ыйга 1 тыһ. солк. төлүүрэ ситиһилиннэ. Уунан туһаныы төлөбүрүн бэйэбит хомуйуохпут, билигин ыаллар тиэргэннэригэр турба тарда, уу тэстэр сирдэрин оҥоро сылдьабыт. Бүгүҥҥү күҥҥэ куорат хоту өттүнээҕи икки микро-оройуоҥҥа 60-тан тахса ыал холбонон, уунан туһана олороллор.
Куорат Сэбиэтин дьокутаата Валентин Иванов уолаттарын Владигы уонна Вованы кытары буор хаһыытыгар, турбалары холбооһуҥҥа үлэлии сылдьара үтүө холобур буолар. Бэйэтэ тутааччы идэлээх Валентин Иванов сайыҥҥы уу ситимин тардыынан 2018 сылтан дьарыктанар. Кэргэнэ, эмиэ куорат Сэбиэтин дьокутаата Василина Татаринова уокурун олохтоохторун көрдөһүүлэринэн, былырыын 36 ыалга ууну тиэрдибиттэрэ. Кэргэннии дьокутааттар икки сыллаах үлэлэрэ түмүктээх буолбута, сэбиэскэй кэмнэртэн уута суох олорбут киин уокурук олохтоохторун үөрүүлэрэ, махталлара үгүс.
Куорат Сэбиэтин дьокутаата Валентин Иванов:
— ОДьКХ СУТ салаата миигин көрдөһөн, “СХТ” уонна “Октябрьскай” микро-оройуоннар дьокутаатарын Марианна Спиридонованы, Саргылана Кузьминаны кытта кэпсэтэн, оройуон Сэбиэтин дьокутаата Александр Григорьев көмөлөһөн, бары бииргэ түмсэн икки уокурукка уу ситимин үлэлэтэргэ сүбэлэспиппит. Билигин Грабовскай уулуссаҕа ПВХ матырыйаалынан оҥоһуллубут тымныыны тулуһар 80 миэтирэ турбаны тарда сылдьабыт. Бэйэм уолаттарым улаатаннар илии-атах буолан көмөлөһөллөр. Горькай аатынан уулуссаҕа олорор Елисеевтаргэ турбалары саҥаттан тардан биэрдибит, урут кырааннарын сабаары ыал нөҥүө сылдьаллара тохтоото. Дьоҥҥо табыгастаах гына оҥоро сатыыбыт.
Ити курдук, дьокутааттар дьон туһугар түмсүүлээх үлэлэрин түмүгэр Бүлүү куоратыгар сайыҥҥы уу ситимэ үлэлиир, ыаллар оҕуруоттарыгар, дьиэлэригэр ууну хото тутталлар! Дьокутааттар эһиил куорат дьаһалтата үбүлээтэҕинэ, ууну туттуу сыанатын төлөбүрүн, ситим ороскуотун аччатарга үлэлэһэр былааннаахтар.
Бүлүүттэн Николай Куприянов, «Саха сирэ», edersaas.ru