Бу дьыала былырыын балаҕан ыйыгар Чурапчы улууһугар буолбута.
Дьыала суут мунньаҕар көрүллэн, бириигэбэр тахсыбытын туһунан СӨ Борокуратууратын пресс-сулууспата иһитиннэрдэ.
Суут быһаарбытынан, «Чурапчы улууһа» МТ дьокутааттарын улуустааҕы сэбиэтин дьокутаата бэйэтин гарааһыгар биир киһилиин тыл-тылга киирсибэккэ кыыһырсан, рихтовочнай өтүйэнэн иккитэ төбөҕө охсон, миэстэтигэр өлөрбүт. Маныаха хаһаайын арыгы испэтэх, оттон эмсэҕэлээччи холуочук эбит.
Суут дьокутааты РФ Холуобунай кодексатын 111-с ыст. 4-с чааһынан, ол эбэтэр, доруобуйаҕа ыарахан эмсэҕэлээһини соруйан оҥорон, сэрэҕэ суохтан өлүүгэ тиэрдиигэ буруйдааҕынан билиммит.
Итиэннэ судаарыстыбаннай буруйдааччы (борокуруор) санаатын, үчүгэй характеристикалары, ити иннинэ холуобунай да, административнай да эппиэккэ тардылла сылдьыбатаҕын, үс кыра оҕолооҕун учуоттаан, 3 сылга кытаанах режимнээх холуонньаҕа көҥүлүн быһарга уурбут.
Бириигэбэр сокуоннай күүһүгэр киирэ илик.
Вера МАКАРОВА, «Саха сирэ» хаһыат, edersaas.ru
Хаартыска: интернеттэн.