Үөһээ Бүлүү улууһугар суут уурааҕынан нэһилиэк сэбиэтин дьокутаатын мандаатын былдьаатылар.
Ол курдук, СӨ Борокуратууратын пресс-сулууспата иһитиннэрбитинэн, Үөһээ Бүлүү оройуоннааҕы суута нэһилиэк сэбиэтин дьокутаатын холуобунай дьыалатын көрөн, бириигэбэр таһаарбыт.
Суут быһаарбытынан, былырыын тохсунньу 9 күнүгэр бу дьокутаат биир киһилиин арыгылыы олорон кыыһырсыбыттар. Ол түмүгэр, дьокутаат бу киһини кырбаан, доруобуйатыгар ыарахан эмсэҕэлээһини оҥорбут. Холуобунай дьыала РФ Холуобунай кодексатын 111-с ыст. 2-с чааһын «з» пуунунан, ол эбэтэр, кытаанах тэрили туттан киһини эчэтии иһин тэриллибит эбит.
Суут дьокутааты ити ыстатыйанан буруйдааҕынан билинэн, 3 сылга көҥүлүн быһары усулуобунайынан ааҕан, 2 сыл тургутар болдьоххо уурбут. Бириигэбэр сокуоннай күүһүгэр киирбит.
Маныаха «РФ олохтоох салайыныыны тэрийии уопсай бириинсиптэрин туһунан» федеральнай сокуон ирдэбилинэн, суут сокуоннай күүһүгэр киирбит буруйдуур бириигэбэрин кэнниттэн дьокутаат боломуочуйата болдьоҕун иннинэ быһыллар.
Итинэн сибээстээн, улуус борокуратуурата бэрэстэбиитэлинэй уорган бэрэссэдээтэлин аатыгар ол туһунан иһитиннэрии ыыппыт. Борокуратуура ити иһитиннэриитэ көрүллэн, дьокутаат боломуочуйата быһыллыбыт.
Биһиги корр., «Саха сирэ» хаһыат, edersaas.ru
Хаартыска: интэриниэттэн.