Дьокуускай мэрин солбуйааччы уонна Ил Түмэн дьокутаата браконьердааһыҥҥа уорбаланаллар
Бүгүн, ол эбэтэр алтынньы 22 күнүн сарсыардатыгар “Недебри” телеграмм-ханаал “Дьокуускай куорат мэрин бастакы солбуйааччыта Владимир Федоров уонна Ил Түмэн дьокутаата (аата-суола биллибэт) браконьердааһыҥҥа уорбаланалларын” туһунан иһитиннэриини тарҕатта. Онно ыйылларынан, үрдүк сололоохтор алтынньы 21 күнүгэр сарсыарда 7 чаас 30 мүн. Маҥан аэропуордуттан Eurocopter бөртүлүөтүнэн Маҥан-Төхтүр-Владимировка-Маҥан хайысхатынан көтүүгэ сылдьыбыттар.
Экология, айылҕаны туһаныы уонна ойуур хаһаайыстыбатын министиэристибэтиттэн иһитиннэрэллэринэн, салгын аалын туһанан бултааһын туһунан социальнай ситимҥэ тарҕаммыт сонун олохтоох соҕус эбит. Бэҕэһээ, алтынньы 21 күнүгэр, туһааннаах министиэристибэ судаарыстыбаннай иниспиэктэрдэрэ олохтоох нэһилиэнньэттэн сокуоннайа суох бултааһын туһунан иһитиннэрии киирээтин суһаллык хонтуруоллуур-кэтиир дьаһалы ыыппыттар. Рейдэ түмүгэр бөртүлүөтү туһанан бултааһын түбэлтэтэ таһаарыллыбыта бигэргэммит. Билигин быраабы араҥаччылыыр уорганнар РФ Холуобунай кодексын 144-145-с ыстатыйаларынан процессуальнай бэрэбиэркэни ыыта сылдьаллар.
Василий НИКИФОРОВ, edersaas.ru