Бүгүн, ахсынньы 30 күнүгэр, сарсыарда аҕыс чааска Дьокуускай куорат баһылыга Евгений Григрьев Комсомольскай болуоссакка бэйдиэ сылдьар ыттары тутарга анаан тэриллибит суһал ыстаап мунньаҕын ыытта. Мунньахха анал биригээдэлэр уонна ботурууллуур бөлөхтөр кытыннылар.
Бүгүҥҥү күҥҥэ ыттары тутар 11 эбии бөлөх тэриллэн, барыта 15 биригээдэ буолла, 30 киһи баар. Хас биирдии биригээдэҕэ квалификациялаах үлэһиттэр, кинологтар ананнылар. Тустаах инструктаж ыытылынна. Үлэ туох баар сокуон чэрчитинэн ыытыллар.
Управаларга ботурууллуур мобильнай бөлөхтөр ананнылар. Кинилэр ханна бэйдиэ ыттары көрбүттэрин тута биригээдэлэргэ биллэрэн иһиэхтэрэ. Ол курдук, бүгүн сарсыарда куорат дьаһалтатын, управалар, муниципальнай тэриллиилэр, суһал сулууспалар 170-тан тахса үлэһитэ, итиэннэ 47 тиэхиньикэ баар.
“Биһиги уопсай сорукпут – чугаһынан кэмҥэ кутталлаах ыттары тутан, балаһыанньаны быһаарыы. Төһө даҕаны ыксаллаах быһыы-майгы буолбутун иһин, сокуоҥҥа чөп түбэһиннэрэн үлэлиэхтээхпит”, — диэн баһылык Евгений Григорьев этэр.
Суһаллык дьаһанарга ЕДДС баазатыгар суукканы эргиччи киин үлэлиир.
Диспетчер сулууспатын нүөмэрэ: 44-46-54, 44-42-29.
Итиэннэ чат-бот үлэлиир: +7(914)261-06-98.
Бу нүөмэргэ олохтоохтор ханна бэйдиэ сылдьар ыттары көрбүттэрин хаартыскаҕа түһэрэн, видеоҕа устан ыытан, биригээдэни ыҥырыахтарын сөп.
Бу туһунан Дьокуускай дьаһалтатын пресс-сулууспата иһитиннэрэр.