Саха сириттэн быйыл оскуоланы бүтэрбит 19 ыччат Омскайдааҕы А.В. Ляпидевскай аатынан гражданскай авиация летнай-техническэй кэллиэһигэр үөрэххэ туттарсан киирдэ.
edersaas.ru
Бу туһунан Ил Дархан Айсен Николаев бүгүн бэйэтин Instagram страницатыгар суруйда. «Ыччаттар бүддьүөт салаатыгар үөрэниэхтэрэ. Саха сирин ыччаттара үөрэххэ киириилэригэр иккис сылын үлэлиир «Ыччаты — авиацияҕа» өрөспүүбүлүкэтээҕи бырайыак төһүү өйөбүлүнэн буолла. Үөрэхтэрин бүтэрэн баран, эдэр пилоттар Ми-8 бөртөлүөккэ үлэлиэхтэрэ. Кинилэри «Полярные авиалинии» авиахампаанньа үлэнэн хааччыйыаҕа.
«Кэлиҥҥи сылларга өрөспүүбүлүкэҕэ бөртөлүөт пилоттара тиийбэт буолан, каадыр боппуруоһа уустугурбута. Онон бу кыһалҕаны туоратар инниттэн 2018 сыллаахха Арктика сайдыытыгар туһуламмыт Судаарыстыбаннай хамыыһыйа мунньаҕар мин полярнай авиацияҕа, ордук Ми-8 бөртөлүөт лүөччүктэрин бэлэмнээһиҥҥэ этии киллэрбиппин, РФ Бырабыыталыстыбата ылыммыта«, — диэн суруйар Айсен Сергеевич.
Ил Дархан эдэр курсаннарга үөрэхтэригэр ситиһиини баҕаран туран, кинилэр бары төрөөбүт өрөспүүбүлүкэлэригэр төннөн кэлэн, идэлэригэр бэриниилээх исписэлиистэринэн буолуохтара, диэн эрэлин биллэрдэ..
Бэлиэтээн эттэххэ, Омскайдааҕы А.В. Ляпидевскай аатынан гражданскай авиация летнай-техническэй кэллиэс элбэх хайысхалаах идэни биэрэр орто анал үөрэх тэрилтэтэ. Манна үөрэммит дьон 4 авиационнай идэҕэ (пилот, авиационнай мэхээньик, авиационнай уонна радиоэлектроннай тэрил исписэлииһэ) уһуйуллан тахсаллар. Орто анал үөрэх тэрилтэтэ Арассыйаҕа Ми-8 бөртөлүөт пилоттарын уонна бортмэхээньиктэрин бэлэмниир соҕотох орто анал үөрэх тэрилтэтэ.
Елена ПОТОЦКАЯ, «Саха сирэ» хаһыат, edersaas.ru
Хаартыска — интэриниэттэн.