Хатаска сыл түмүгүнэн култуура эйгэтин араас хайысхатыгар ситиһиилээхтэри, төрөөбүт-үөскээбит төрүт сирдэрин ааттата сылдьааччылары бэлиэтиир “Көмүс кынат” тэрээһин төрдүс сылын буолан ааста. Тэрээһин, аата да этэринии, ситиһииттэн сиэттэрэн, кыайыыттан кынаттанан салгыы айар-тутар суол аартыктарын арыйан силиһэ-мутуга дириҥиэ, эйгэтэ кэҥиэ диэн туран, анал ааттары иҥэрии буолла.
edersaas/ru
АНАЛ ААТТАР
“Бастыҥ кэлэктиип” — “Айхал” үҥкүү ансаамбыла (хореограф А.А.Семенова, уус-уран салайааччы — Т.Г.Жиркова).
“Айхаллар” бу сылларга саҥаттан саҥа үҥкүүлэри туруордулар, таҥас-сап тиктэрдилэр, араас сири-дойдуну көрдүлэр, үрдүк үрдэллэргэ үктэннилэр. Бу тухары төрөөбүт төрүт дойдуларын Саха сирин, олорор түөлбэлэрин Хатаһы дорҕоонноохтук ааттаттылар.
“Кэрэ эйгэ кэрэһиттэрэ” — Хатастааҕы оҕо искусствотын оскуолатын уһуйааччылара Анна Семёнова, Зинаида Оконешникова. Оҕо аймах сайдыы-үүнүү суолун тобуларыгар муусуканы олус табыгастаахтык көмөлөһүннэрэн, дорҕоон доҕуһуолугар уйдаран, айар аартыгы арыйбыт үтүөкэн дьон.
“Бастыҥ артыыс” — Станислав Федоров.
“Тускул” Култуура киинин иһинэн Дьокуускай куорат киэҥ туонатыгар соҕотох норуодунай тыйаатыр артыыһа. Станислав дэгиттэр талааннаах: ыллыыр, үҥкүүлүүр, артыыстыыр. Маны таһынан, кини асчыт бэрдэ.
“Дайар кынат” — Сардаана Старкова.
Кини Москваҕа түөрт сыл устата киинэ уһуллуутун ымпыгын-чымпыгын дириҥник чинчийэн, дьиҥ чахчы академическай үөрэҕи ылбыта. Дипломнай үлэтэ үрдүктүк сыаналанан, үөрэммит кыһатын архыыбыгар киирэр чиэскэ тиксибитэ биһигини үөрдүбүт түгэннээх. Уус уран уонна документальнай киинэлэргэ кэккэ интэриэһи тардыбыт үлэлэрдээх, ону таһынан, килииптэрдээх.
“Сырдык сулус” — Лена Олёнова.
Лена дьиҥ чахчы саха киһитэ, сахатынан киэн туттар, саха буоларын өрө тутар, саха култууратын аан дойду таһымыгар күөрэччи илдьэ сылдьар.
“Көмүс иннэ” — Мария Дегтярёва.
Дегтярёвтар — дьиэ кэргэнинэн иис-күүс диэни эттэринэн-хааннарынан, өйдөрүнэн-санааларынан билэр дьон. Кинилэр кыһыҥҥы, сайыҥҥы таҥаһы, сувенирдары, декоративнай паннолары, көбүөрдэри тигэллэр, тугу да сыыска-буорга түһэрбэккэ барытын туһаҕа таһаарар уратылаахтар. Дьэ бу улахан хамаанда хамсатар күүһэ — Мария Сергеевна.
“Талба хотун” — Дария Козлова.
Ис туругунан, дьулуурунан, туппутун ыһыктыбатынан уос номоҕор сылдьар Далбар Хотун киэҥ Сахабыт сирин кэрийэн, элбэх талааннары арыйан, төрүт иис төлкөлөөх түөлбэтин төрүттээтэ, сахалыы өйү-санааны иҥэрдэ.
“Ситиһии” — Татьяна Попова.
Киһи тылынан кыайан эппэтин, дууһа иэйиитин, сүрэх үөрүүтүн уруһуй нөҥүө биэриэххэ сөбүн «Уруһуй — дууһа абылаҥа» түмсүү кыттыылаахтарын үлэлэригэр көрөбүт. Татьяна ‘’Труженицы тыла’’ хартыыната Москва куоракка көрдөрүллүөхтээх. Хатас олохтоохторугар ураты уйан туругу биэрэр хартыынаҕа нэһилиэк 3 кэрэ далбара ойууламмыт.
“Бастыҥ сырдатааччы” – Надежда Егорова-Намылы.
“Саха сирэ” хаһыат эрэдээктэрэ Родион Кривогорницын сонун көрүүтүнэн, Хатаска аналлаах хаһыат таһаарылла сылдьыбыта. Бу хаһыаттарга Надежда Егорова Хатас олохтооҕо да буоларын быһыытынан уонна айар үлэҕэ сыһыаннаах да буолан, Хатас олоҕун көрдөрөр бииртэн биир интэриэһинэй матырыйааллара бэчээттэнэн, нэһилиэк олоҕо-дьаһаҕа өрөспүүбүлүкэ дьонун-сэргэтин сэҥээриитин ылбыта.
“Бастыҥ сырдатааччы” анал аат өссө биһиги биир дойдулаахпытыгар, бэйэтин эйгэтигэр куруук бастыҥнар ахсааннарыгар сылдьар, дэгиттэр талааннаах репортер, видеооператор, кэрэспэдьиэн Михаил Мордовскойга-Михутаҕа иҥэрилиннэ.
«Сырдык сыдьаайа» – Сардаана Колосова.
Кини — нэһилиэк уопсастыбаннай олоҕун көхтөөх кыттааччыта, алта оҕо күн күбэй ийэтэ, «Сир симэхтэрэ» оҕо уһуйааныгар иитээччи көмөлөһөөччүтэ. Кэргэнэ Денис Колосов кэргэнин ханнык да саҕалааһынын сыыһа-халты, сатаммат диэбэккэ, куруук өйүүр-өйдүүр.
Ханна баҕарар буоларын курдук, ханнык да тэрээһин үбэ-харчыта суох ыытыллыбат. «Тускул» КК тэрээһиннэрин өйдүүр-өйүүр дьоммут кимнээхтэрий?
“Бастыҥ спонсор” — Димир Кириллин.
Кини буһуу-хатыы оскуолатын ааһан, үлэлээн-хамсаан, бэйэтэ туспа тэрилтэлээх. Биһиги алта уонча түмсүүлэрбититтэн биир саамай элбэх киһини хабар, суоллаах-иистээх, интэриэһинэй тэрээһиннэрдээх түөлбэ бэрэстэбиитэлэ буолар.
«Бастыҥ уопсастыбанньык» — Герман Иванов (“Моисеевка” түөлбэ салайааччыта).
“Түмэр күүс” — Николай Попов (“Бастакы Баҕарах” түөлбэ салайааччыта).
“ИННИКИТИН ДА БИИРГЭ ҮЛЭЛИЭҺИЭХПИТ”
“Көмүс кынат” бириэмийэҕэ тиксибиттэр үлэлэрэ биһирэммититтэн долгуйалларын эттилэр уонна инникитин даҕаны бу курдук олох үөһүгэр сылдьарга эрэннэрдилэр. Наҕараадаламмыт дьоннору аймах-билэ дьонноро, түөлбэлэрин актыыптара уонна киэҥ эйгэҕэ биллэр дьон: Хатас сэлиэнньэтин баһылыга Евгений Пермяков, «Тэтим» араадьыйа ыытааччыта, СӨ култууратын үтүөлээх үлэһитэ, биллиилээх суруналыыс Альбина Тарабукина, өрөспүүбүлүкэтээҕи Норуот айымньытын дьиэтин сүрүн исписэлииһэ, СӨ култууратын туйгуна, биһигини кытта ыкса тутуһан үлэлии сылдьар Полина Слепцова, Уокуруктааҕы норуот айымньытын киинин сүрүн исписэлииһэ, СӨ култууратын туйгуна Розалия Громова, «Тускул» Култуура киинин салайааччыта, СӨ култууратын үтүөлээх үлэһитэ Людмила Чепалова эҕэрдэлээтилэр, алгыстарын анаатылар.
«Саха сирэ» хаһыакка, edersaas.ru анаан Наталия РУФОВА,
Валентин ЧЕПАЛОВ түһэриилэрэ.