Дойдуга сааскы ыһыы үлэтэ былаан быһыытынан баран иһэр

Ааптар: 
Бөлөххө киир:

Арассыыйа Федерациятын Тыатын хаһаайыстыбатын министиэристибэтэ иһитиннэрэринэн, дойдуга сааскы ыһыы үлэтэ былаан быһыытынан баран иһэр.

edersaas.ru

Соҕурууҥҥу уонна киин уокуруктар бурдугу уонна атын култууралары ыһыыны бүтэрбиттэр. Холобур, Ставрополь уобалаһын хаһаайыстыбалара 197,4 тыһ. гектар бааһынаҕа кукурузаны, 312,3 тыһ. гектар бааһынаҕа подсолнуҕу ыспыттар. Тамбов уобалаһын хаһаайыстыбалара бурдуктарын ыһыытын кэнниттэн хортуоппуйу уонна аһаҕас буорга үүнэр оҕуруот аһын олордо сылдьаллар. Бүгүҥҥү туругунан, хортуоппуйу 1,6 тыһ. гектарга (былаан — 4 тыһ. гектар), оҕуруот аһын 150 гектарга (былаан – 350 гектар) олордубуттар.

Сибиирдэр да хаалсыбаттар. Ол курдук, Новосибирскай уобалас аграрийдара ыһыыларын саҕалаабыттар. Быйыл бааһыналарын 36,5 тыһ. гектарынан кэҥэтэн, 2 мөл. 260 тыһ. гектарга үлэлиир, ол иһигэр бурдугу 1 мөл. 464 тыһ. гектарга ыһар былааннаахтар.

Ити курдук, дойдуга ас-үөл өттүнэн куттал суох буолуутун хааччыйар АПК салаатыгар дьон үлэтэ суох хаалыыта таһаарыллыбатах, үлэ-хамнас барыта былаан итиэннэ агротехнология быһыытынан ыытыллар. Онуоха хонуу, бааһына үлэһиттэригэр эрэ буолбакка, инженердэргэ, наладчиктарга, IT технологиятын исписэлиистэригэр наадыйыы улахан.

Ыһыы үлэтэ былырыыҥҥы кытта тэҥнээтэххэ, быйыл быдан тэтимнээх. Дойду үрдүнэн бас билии көрүҥүттэн тутулуга суох ыһыы барыта 10,5 мөл. гектар бааһынаҕа ыытыллыбыт, ол иһигэр, бурдук 6,3 мөл. гектарга ыһыллыбыт. Былырыын баччаларга бу көрдөрүү туһааннааҕынан 9,6 мөл. уонна 5,7 мөл. гектар эбит. Бу туһунан Арассыыйа Федерациятын  Тыатын хаһаайыстыбатын пресс-сулууспата иһитиннэрэр.

Раиса Сибирякова, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0