Украина-Арассыыйа сыһыаннарыгар буола турар балаһыанньа туһунан Саха сирин олохтоохторо бэйэлэрин санааларын үллэстэллэр.
Михаил Охлопков, «Бизнесинфо” ХЭТ инженерэ:
– Биллэн турар, сэрии барыбытыгар куһаҕан содуллаах. Ол эрээри сэриигэ тиийии муҥур уһук, тиһэх миэрэ дии саныыбын. Хайдах да гынан сөбүлэһэр кыах суох буолан, дойду куттала суох буолуутун хаачыйар сыалтан, маннык балаһыанньаҕа тиийдибит.
Буола турар балаһыанньаны үөрэтэр, билэр туһуттан, мин күннэтэ араадьыйаны, “РБК” сонуннарын истэбин, ааҕабын. ДНР, ЛНР олохтоохторо бу кэнники сылларга хайдахтаах батталга, кутталга олорбуттарын саҥа биллим. 14 тыһыынча киһи өлбүт, күүһүлэммит, 100-тэн тахса оҕо өлбүт…
Биһиги бэйэбитин бу маннык балаһыанньаҕа оҥорон көрдөхпүтүнэ, Арассыыйа көмүскүүрүн билэн баран, төһөлөөх үөрүө этибитий? Онон, Арассыыйа олохтоохторо, бэйэбит салалтабытын өйүөхтээхпит, барытын ырыҥалаан, ыйааһыннаан көрөн баран ылыллыбыт быһаарыы буоларын өйдүөх тустаахпыт.
Тус бэйэм салалтабытын 100% өйүүбүн, сөптөөх быһаарыныы ылылларыгар эрэнэбин.
Ангелина Васильева, “Саха сирэ” хаһыат, edersaas.ru
Хаартыска: дьоруой архыыбыттан.