Дойдуга эмтээх препараттар саппаастарыгар балаһыанньа, ол иһигэр олоххо-дьаһахха тыын суолталаах эмтэргэ, биллэ туруктааҕын туһунан РФ доруобуйа харыстабылыгар миниистирэ Михаил Мурашко санкция кэмигэр эминэн уонна мэдиссиинискэй тэриллиилэринэн хааччыллыы туһунан мунньахха иһитиннэрдэ.
edersaas.ru
«Кэккэ эмтэргэ биһиги эрдэ 2-3 сыллаах хантараактары түһэрсибиппит, ол эми хааччыйыы туруктаах буоларыгар эрэли үөскэтэр. Дистрибутордар ыскылааттарыгар хайыы үйэ улахан саппаас баар», —– диэтэ миниистир.
Кини эппитинэн, омук сириттэн эми аҕалары хааччахтыыр туһунан сайабылыанньалар билиҥҥитэ суохтар.
Эмтээх препараттарынан хааччыллыы туруктаах буоларыгар дойдуга фармация салаатын ковиды утары үлэтин уопута көмөлөспүтүн бэлиэтээтэ.
Онтон Саха сиригэр ыытыллыбыт мониторинг көрдөрөрүнэн, өрөспүүбүлүкэ сиригэр-уотугар эмп саппааһа (ол иһигэр, коронавируһу эмтиир препараттар) баар. Ол туһунан Саха Өрөспүүбүлүкэтигэр доруобуйа харыстабылын эйгэтигэр кэтээн көрөр федөральнай сулууспа территориальнай уорганын салайааччыта Евгений Иннокентьев Суһал штаб брифинигэр иһитиннэрбитэ. Өрөспүүбүлүкэ бырабыыталыстыбаларын саппаас пуондаларыттан көрүллүбүт үбүнэн 440 тыһыынчаттан тахса эмп атыылаһыллыбыта.
Саха сирин аптыакатын ситимигэр 200-чэ чааһынай аптыака, аптыака 9 кууһунан атыылыыр ыскылаата уонна кэккэ мэдиссиинискэй тэрилтэлэр фармация үлэтинэн дьарыктаналлар.
Надежда ЕГОРОВА, «Саха сирэ», edersaas.ru