Аныгы кэмҥэ оҕону, ыччаты дойдуга бэриниилээх гына иитии судаарыстыба сүрүн соругунан буолар. Бу туһунан бэҕэһээ СӨ Ил Дархана Айсен Николаев быһа сибээскэ этэн турар.
Бэлиэтээн суруйдахха, билигин оскуолаларга судаарыстыба гиимнин ыллаан, дойдубут былааҕын күөрэччи тутан оҕолорго кыра саастарыттан патриотическай иитиини учууталлар да, үөрэнээччилэр да бэрт сэргэхтик үөрэ ылыммыттара.
Оҕону, ыччаты патриотическай хабааннаахтык иитиигэ тус санаатын Ил Түмэн бэрэссэдээтэлин бастакы солбуйааччы Александр Николаевич Жирков үллэһиннэ:
— Төрөөбүт сирин-уотун, дойдутун таптыыр, онно тардыһыылаах буола улаатыы барыта дьиэттэн-уоттан саҕаланар. Аан дойдуну барытын таптыыр уустук. Онон бэйэтин дьиэтин-уотун, чугас дьонун ытыктыы иитиллибит оҕо хаһан даҕаны куһаҕан майгылаах буолбат. Маннык иитиллибит оҕолортон дьиҥнээх дойдуга бэриниилээх ыччат үүнэр дии саныыбын. Онон оҕо иитиитигэр билиҥҥи төрөппүттэр улахан болҕомто ууран, дьиҥнээх патриоттары иитиигэ үлэлэһиэхтээхтэр.
Ульяна ЗАХАРОВА.