Саха сиригэр Дойдуга бэриниилээх буолуу сылын, Арассыыйаҕа Өйдөбүнньүк уонна Албан аат сылын арыйдылар.
Ленинград блокадатыттан босхолонуу 76-с сыла туолар күнүгэр Нуучча тыйаатырыгар үөрүүлээх тэрээһин буолла.
— Быйыл үбүлүөйдээх сыл. Улуу Кыайыы 75 сылын бэлиэтиэхпит. Аҕа дойдуну көмүскүүр сэриигэ Кыайыы – биһиги дойдубут уопсай киэн туттуута. Онон сэриигэ өлбүт дьоруойдары кэриэстээһин, сэрии сылларын кырдьыга өлбөөрбөтүн туһугар туруулаһыы, бэтэрээннэргэ болҕомтобутун ууруу – биһиги ытык иэспит. 2020 сылы Ил Дархан Дойдуга бэриниилээх буолуу сылынан биллэрдэ. Норуотун, дьонун-сэргэтин таптыыр эрэ киһи дойдутугар бэриниилээх буолар, — диэн бырабыыталыстыба бэрэссэдээтэлин солбуйааччы Ольга Балабкина тыл эттэ.
Бэтэрээннэр ааттарыттан Аҕа дойду сэриитин кыттыылааҕа, Аҕа дойду сэриитин II истиэпэннээх уордьанын кавалера, Сунтаар улууһун Бочуоттаах олохтооҕо Петр Яковлев Ленинградка үөрэнэ барбыт оҕолор дьылҕаларын туһунан кэпсээтэ. 32 эдэркээн уолаттартан, кыргыттартан 15 эрэ киһи тыыннаах ордубут. Кини эдэр көлүөнэҕэ эрэнэрин биллэрдэ.
Салгыы бэтэрээннэр “Өйдөбүнньүк капсулатын” эдэр көлүөнэҕэ туттардылар. Капсуланы 10 сылынан, кыайыы 85 сылыгар арыйыахтара. Билиҥҥитэ Дьокуускай куорат Бойобуой албан аат мусуойугар хараллыаҕа.
Ангелина Васильева, “Саха сирэ” хаһыат, edersaas.ru