От ыйын 1 күнүгэр ыытыллар РФ Сүрүн Сокуонугар уларытыылары киллэриигэ куоластааһын туһунан билигин киэҥ кэпсэтии бара турар.
Мин бу боппуруоска санаатын үллэстэригэр Саха Өрөспүүбүлүкэтин Г.М.Кривошапко аатынан Судаарыстыбаннай филармониятын дириэктэрэ Туйаара ПЕСТРЯКОВАТТАН көрдөстүм.
— Бу, бэрт судургута суох бырассыас дии саныыбын. Ол эбэтэр, үгүс дьону куоластааһын тэрээһинэ долгутар – улахан, элбэх уларытыылары, көннөрүүлэри биир кэлим испииһэгинэн, соһуччутуҥу, суһал соҕустук куоластааһын барар.
Биллэн турар, мин, култуура эйгэтин бэрэстэбиитэлэ буоларбынан, култуураны өйөөһүнү сэргии истэбин. Тоҕо диэтэххэ, култуура – бу эмиэ бэйэтэ туспа кыһалҕалардаах, сайдыыга сокуоннардаах систиэмэ буолар. Онон, дойду Сүрүн Сокуонугар киллэрии култуура туруктаахтык сайдыытыгар, суолтата улаатыытыгар, култуура диэйэтэллэрин, култуура үлэһиттэрин статустара үрдүүрүгэр көмөлөөх буолуохтаах. Ол дойду бүттүүнэ бөҕөргүүрүгэр суолталаах.
Онон, ытыктабыллаах биир дойдулаахтарым, быыбардыыр учаастактарга тиийэн, бэйэбит быыбарбытын оҥорон, РФ гражданинын быһыытынан, иэспитин толоруоҕуҥ, — диэтэ онуоха Туйаара Игоревна.
Татьяна Маркова.