Василий Дмитриевич Окороков, “СӨ ОДьКХ “ГУП Мэҥэ Хаҥаластааҕы филиалын учаастагын маастара, “Саха сирин киэн туттуута” бириэмийэ “ОДьКХ үлэһитэ” номинациятын кыайыылааҕа, Майа сэлиэнньэтин олохтооҕо:
— Мин “СӨ ОДьКХ” ГУП Мэҥэ Хаҥаластааҕы филиалын учаастагар маастардыыбын. Биһиги учаастакпыт (начаалынньык П.И.Цыпандин) түөрт эбийиэги, ол иһигэр үс хочуолунайы уонна уу скважинатын көрөр-истэр. Учаастакпыт 23 үлэһитэ бары таһаарыылаахтык үлэлиир туһугар кыһанабыт. Быйылгы кыстык этэҥҥэ ааһан эрэр. Кэлэктиибинэн Майаҕа үгэс курдук ыытыллар Култуура уонна успуорт эстафетатыгар ситиһиилээхтик кытынныбыт дии саныыбын, төрдүс миэстэ буолбуппут. Оттон билигин коронавирус дьаҥа турбутунан тэрилтэбит бары сэрэтэр миэрэлэри тутуһар, тустаах сириэстибэлэринэн филиал хааччыйбыта.
Итинник кылгастык этэн туран, өрөспүүбүлүкэ бары олохтоохторун, чуолаан, Улуу Кыайыыны уһансыбыт сэрии, тыыл бэтэрээннэрин, Мэҥэ Хаҥалас бары олохтоохторун, “СӨ ОДьКХ” ГУП бары үлэһиттэрин, үлэлиир учаастагым кэлэктиибин бука барыгытын сандал сааһы кытта тэбис тэҥҥэ бэлиэтэнэр Саха Өрөспүүбүлүкэтин күнүнэн истиҥник эҕэрдэлиибин. Биһиги көлүөнэ дьон устуоруйа туһунан билиибитигэр үөрэппит учууталларбыт улахан оруоллаахтар. 1922 сыллаахха муус устар 27 күнүгэр төрөөбүт Сахабыт сирэ автономияны ылыммытын киһи барыта билэр. Онон бу өрөгөйдөөх күнү Саха Өрөспүүбүлүкэтин олохтоохторо Өрөспүүбүлүкэ күнүнэн ылынабыт. Сайдар Сахабыт сирин сарсыҥҥыта ситиһиилэрдээх, дойдуга бигэ олохтоох, экэниэмикэлээх олохтоох эрэгийиэн буоларыгар бука бары күүспүтүн ууран үлэлиэҕин-хамсыаҕыҥ. Билигин Ил Дархаммыт Айсен Николаев, СӨ Ил Түмэнин салалталарынан оҕолорбут, кэлэр кэнчээри ыччаппыт дьоллоох-соргулаах олохтоноллоругар бигэ акылааты бэлэмниэҕиҥ.Өрөспүүбүлүкэ күнүнэн, күндү доҕоттор!
Женни СТРЮКОВА, “Саха сирэ” хаһыат
Хаартыска: СИА-ттан.