Дойду тэбэр сүрэҕиттэн кыайыы кынаттаах

Ааптар: 
Бөлөххө киир:

Култуура үлэһиттэрин Бүтүн Арассыыйатааҕы үһүс чөмпүйэнээтэ Москваҕа ыытыллыбыта. 

Бу тэрээһиҥҥэ эбии үөрэхтээһин хайысхатыгар Үөһээ Бүлүүттэн Н.И.Бойлохов аатынан оҕо ускуустубатын оскуолатын фольклор салаатын преподавателэ Сахаайта Мойтохонова уонна Хатастан «Тускул» култуура киинин исписэлииһэ Валентин Чепалов ситиһиилээхтик кыттаннар, дойдулаахтарын улаханнык үөртүлэр. Дьүүллүүр сүбэҕэ наука хандьыдааттара, искусствоведтар үлэлээтилэр. Күрэс ирдэбилинэн хас биирдии кыттааччы үлэлиир ньыматын, ситиһиилэрин, инники былааннарын кэпсээтэ уонна үлэҕэ үөрүйэхтэрин атастаста.

Күөн күрэс түмүгүнэн хайысхаларынан биирдии кыайыылааҕы быһаардылар. Култуура үлэһиттэрин хайысхатыгар Валентин Чепалов, оттон эбии үөрэхтээһин хайысхатыгар Сахаайта Мойтохонова кыайыылаах тахсаннар, биһигини улаханнык үөртүлэр. Дьүүллүүр сүбэ Валентин Чепалов аныгы технологиялары култуура тэрилтэтигэр туһаныы ньымаларын үрдүктүк сыаналаабыт. Оттон Сахаайта Мойтохонова цифровой аудиовизуальнай архыыбын сэҥээрбиттэр, ыччаты уһуйууга улахан ­суолталааҕын бэлиэтээбиттэр. Манна даҕатан эттэххэ, 2015 сылтан Үөһээ Бүлүүгэ оҕо ускуустубатын оскуолатыгар Сахаайта Мойтохонова ааптарыскай бырагырааматынан, билиҥҥи федеральнай судаарыстыбаннай бырагыраамаҕа эппиэттиир Олоҥхо оскуолатын тэрийэн үлэлэтэр. Кыра саастаах оскуола оҕотуттан саҕалаан улахан дьоҥҥо тиийэ олоҥхоҕо эрэ буолбакка, саха төрүт фольклорун барытын үөрэтэр бырагыраамалаах.

Дьоммут-сэргэбит дойду тэбэр сүрэҕэр улахан күөн күрэскэ кыттан кыайыы көтөллөммүттэриттэн биһиги, дойдулаахтара, олус үөрэбит, Сахабыт сирин ааттата сылдьалларыттан киэн туттабыт, махталбытын биллэрэбит.

Анатолий ИВАНОВ,

Н.И.Бойлохов аатынан оҕо ускуустубатын оскуолатын дириэктэрэ.

Үөһээ Бүлүү.

+1
0
+1
0
+1
0
+1
0
+1
0
+1
0
+1
0