Дойду бэрэсидьиэнэ Владимир Путин алтынньы 5 күнүгэр “Арассыыйа бастыҥ учуутала”-2017 бүтүн Арассыыйатааҕы куонкурус лауреаттарын кытта көрүстэ. Итиннэ кини биир кэлим эксээмэннэр түмүгэр 25 баалы эбэри өйүүрүн биллэрдэ. edersaas.ru
Көрсүһүү кэмигэр Москва куорат 171 нүөмэрдээх оскуолатын биология учуутала И.А.Смирнов, билигин оскуоланы бүтэрэр оҕо үрдүк үөрэх кыһатыгар туттарсарыгар портфолиотын көрдөрдөҕүнэ, ханнык күрэхтэһиилэргэ, олимпидаларга миэстэлэспитинэн көрөн 10 баалга диэри эбиллэрин иһитиннэрбитэ. Итиэннэ бэйэлэрин салааларынан эксээмэни ситиһиилээхтик ааспыттар, профессия иннинээҕи бэлэмнэниилэрин иһин баалы 25-кэ диэри тиэрдэр кыах баар дуо, диэн ыйытыы биэрбитэ.
Онуоха бэрэсидьиэн Владимир Путин ити үчүгэй быраактыка буоларын, профессиональнай ориентационнай (идэтин таларыгар эрдэттэн) үлэ төһөнөн эрдэ ыытыллар да, соччонон туһалааҕын эппитэ. Тус бэйэтэ итини өйүүрүн, техническэй өттүнэн РФ Үөрэҕин уонна наукатын министиэристибэтин кытта үлэлэһиэххэ наада диэн үчүгэй этиини киллэрбитин биллэрбитэ.
Ол эрээри, бэрэсидьиэн ити этиитин өйөбүл эрэ курдук ылыаныахха сөп. Тоҕо диэтэххэ, билиҥҥитэ туох даҕаны ыйаах ылылла илик.
Санатан эттэххэ, быйыл саас ити туһунан абитура саҕаланыан аҕай иннинэ, Саха сирин үрдүк үөрэҕин кыһаларыгар туттарсааччыларга анаан, “Эбии баалы хайдах ылабыт?” диэн төбөлөөн, саайпытыгар суруйан турабыт.
Людмила ПОПОВА, “Саха сирэ” хаһыат, edersaas.ru
Хаартыска интэриниэттэн туһанылынна.