От ыйын 24-27 күннэригэр Калининград куорат “Сельма” стадионугар оҕунан ытыыга Арассыыйа чөмпүйэнээтэ буола турар. Манна Саха сирин хамаандата толорута суох састаабынан кыттар.
Арай блочнай оххо эр дьоммут толору састаабынан күрэстэһэллэр: норуоттар икки ардыларнааҕы кылаастаах спорт маастардара Асим Павлов уонна Дмитрий Аюшеев, ону тэҥэ спорт маастардара Семен Захаров уонна Василий Марков.
Бу көрүҥҥэ дьахталларга Арассыыйаҕа бастыыр иһин быйылгы күрэхтэһии призердара Сардаана Жиркова, Юлия Маркова уонна бу аҕыйах хонуктааҕыта ПОДА-лаахтарга дойду чөмпүйүөнүн үрдүк аатын эрэллээхтик ылбыт спорт үтүөлээх маастара Степанида Артахинова кытталлар.
Классическай оххо норуоттар икки ардыларынааҕы кылаастаах спорт маастардара Евгения уонна Розалина Тимофеевалар, эр дьоҥҥо Мичил Алексеев өрөспүүбүлүкэлэрин чиэһин көмүскүүллэр.
Роман Попов, «Саха сирэ», edersaas.ru