Айылҕа харыстабыла Нацбырайыактар

Дойду аахсыйата Нерюнгриттэн саҕаланна

Бүгүҥҥүттэн, атырдьах ыйын 21 күнүттэн, Саха сиригэр “Ойууру харыстыаҕыҥ” Бүтүн Арассыыйатааҕы аахсыйа Нерюнгри оройуонуттан саҕаланна.

Нерюнгри оройуонун Хатыми учаастактааҕы лесничествоҕа тыаны чөлүгэр түһэрии тэрээһинигэр волонтердар, эдэр экологтар, устудьуоннар,  оскуола оҕолоро уон тыһыынча кедр маһы олортулар.

Бу миэстэҕэ мас олордуутун анаан таллыбыт. 2008-2009 сылларга манна улахан ойуур баһаардара буолбуттара. «Экология» национальнай бырайыак чэрчитинэн 620 кв.м иэннээх  сиргэ араас тиит маһы олордор соруктаахпыт. Ил Дархан өйөбүлүнэн маннык аахсыйаны Дьокуускай куоракка уонна өрөспүүбүлүкэ улуустарыгар ыытарга былаанныыбыт, — диэн вице-премьер Дмитрий Бердников бэлиэтээтэ.

“Ойууру харыстыаҕыҥ” дойду үрдүнэн ыытыллар аахсыйаны Саха сирэ бастакынан саҕалаата. Тэрээһин чэрчитинэн Арассыыйа 85 эрэгийиэнигэр  70 мөлүйүөн тиит маһы олордуохтара.

Аахсыйаны РФ Айылҕа харыстабылын министэристибэтэ, Ойуур хаһаайыстыбатын Федеральнай ааҕыныстыбата уонна “Экология”  национальнай бырайыак чэрчитинэн Бүтүн Арассыыйатааҕы айылҕа харыстабылын уопсастыбата тэрийэн ыыталлар.

 

 

Елена ПОТОЦКАЯ, “Саха сирэ” хаһыат.

 

Хаартыска — СИА

0
0