«АгроФарм-2019» норуоттар икки ардыларынааҕы быыстапка чэрчитинэн Москваҕа ыытыллыбыт агрономнар уонна агроинженердэр Бүтүн Арассыыйатааҕы сүбэ мунньахтарыгар ааспыт 2018 сыл түмүктэрэ таһаарылынна, 2019-2024 сыллар соруктара туруорулунна.
edersaas.ru
Сиртэн үүнээйини ылыыга анаммыт бу дьоһун тэрээһиҥҥэ Саха Өрөспүүбүлүкэтиттэн тыа хаһаайыстыбатын миниистирин солбуйааччы Николай Афанасьев баһылыктаах дэлэгээссийэ кытынна. Сүбэ мунньаҕы арыйарыгар дойду тыатын хаһаайыстыбатын миниистирин бастакы солбуйааччы Джамбулат Хатуов тыа хаһаайыстыбатын производствотын сайыннарыыга 2024 сылга диэри сүрүн, чорботуллар сыалынан бурдук сыллааҕы хомуурун 137,5 мөл. туоннаҕа, тас дойдуга таһаарыллар бурдугу 55 мөл. туоннаҕа тиэрдии буоларын бэлиэтээтэ. Бу соругу толорор инниттэн АПК эрэгийиэннэрдээҕи уорганнара туһаныллыбакка сытар бааһыналары кытаанах учуокка ылан, чөлүгэр түһэрэргэ үлэлиэх тустаахтар. Ол курдук, уоҕурдуллар сир иэнэ үс төгүл кэҥэтиллэн, 775 тыһ. гектарга тиэрдиллиэҕэ. Тыа хаһаайыстыбатын тиэхиньикэтин саҥардыы бырагыраамата салгыы үлэлиэ, «Росагролизинг» АУо үлэтэ-хамнаһа кэҥэтиллиэ.
2018 с. биир бастыҥ үлэлээҕинэн Омскай уобалас ааттанна. Бу эрэгийиэн табаары оҥорооччулара 2,8 млрд солк. суумалаах 1324 тиэхиньикэни уонна үлэ тэрилин ылбыттар. Кэнники түөрт сылга дойдуга оҥоһуллубут бурдук хамбаайыннарын атыылаһыы 67 %-тан 78 %-ҥа, оҕуруот аһын хамбаайыннарын атыылаһыы 58 %-тан 74 %-ҥа диэри улааппыт. Бурдук хаһаайыстыбаларын базатын 5 % саҥардыбыттар, 15 устуука бурдугу куурдар комплексы ылбыттар. Маныаха уобалас бырабыыталыстыбата 2017 сыл ыам ыйыгар үлэ тиэхиньикэтин уонна тэрилин атыылаһарга 100 мөл. солк. субсидияны көрөр туһунан ыйааҕа тирэх буолбут.
Ааспыт сайын төһө даҕаны курааннаатар, куһаҕана суох үүнүү ылыллыбыт, сорох култуураларга чыпчаал көрдөрүүлэр ситиһиллибиттэр. Барыллаан түмүк быһыытынан, 19,2 мөл. т арыы сиэмэтэ, баалабайынан 12,6 мөл. т подсолнечник, 3,9 мөл. т соя, 1,98 мөл. т рапс ылыллыбыт. Элбэх сыл кэнниттэн аан бастаан тэпилииссэттэн 1 мөл. т оҕуруот аһа хомуллан, чугастааҕы үс-түөрт сылга оҕуруот аһынан бэйэни толору хааччынарга эрэл үөскээбит. Быйыл ыһыы сирин иэнин 1,2 мөл. гектарынан кэҥэтэн, сааскы ыһыыны 80,5 мөл. гектарга тэрийэн, 108 мөл. т бурдугу, 18 мөл. т арыылаах култууралары, 41 мөл. т саахардаах сүбүөкүлэни, 7 мөл. т хортуоппуйу, 6 мөл. т оҕуруот аһа хомуйар сорук турар эбит.
Раиса Сибирякова, «Саха сирэ» хаһыат edersaas.ru