Эрдэ иһитиннэрбиппит курдук, атырдьах ыйын 2-5 күннэригэр Москва уобалаһын Одинцово куоратыгар көҥүл тустууга күүтүүлээх Арассыыйа чөмпүйэнээтэ буолуоҕа.
Бу улахан түһүлгэҕэ Саха сириттэн Арассыыйа былырыыҥҥы чөмпүйэнээтин, Уһук Илиҥҥи уокурук, “Локомотив” уопсастыба, устудьуоннар ортолоругар дойду күрэхтэһиилэрин түмүктэринэн талыллыбыт 19 бөҕөспүт кыттара былааннанар. Сорох уолаттар Брянскай уонна Москва уобалаһын хамаандаларыттан тустуохтара. Арай ыччаттар ортолоругар Арассыыйа былырыыҥҥы чөмпүйэнээтин үрүҥ көмүс призера Петр Копылов (57 кг), Европа күрэхтэһиитигэр бэлэмнэнэринэн, Одинцово түһүлгэтин көтүтүөҕэ.
Арассыыйа былырыыҥҥы чөмпүйэнээтин призердара Дмитрий Аксенов уонна Виктор Рассадин ыйааһыннарын өрө тахсан, туһааннааҕынан 61 итиэннэ 65 киилэлэргэ тустуохтара. Дойду 2016 сыллааҕы чөмпүйүөнэ Егор Пономарев эмиэ саҥа олимпийскай 65 киилэҕэ диэри ыйааһыҥҥа күүһүн холоһуоҕа.
Бу эппиэттээх күрэхтэһии иннинэ Владимир Кириллин салайар Саха сирин сүүмэрдэммит хамаандата Кабардино-Балкарияҕа уонна Хотугу Осетияҕа-Аланияҕа хайалаах сиргэ бэлэмнэнэр сбору барбыттара.
Саха сирин сүүмэрдэммит хамаандата:
57 киилэ — Арыйаан Тютрин, Егор Потапов, Алексей Копылов
61 киилэ — Дмитрий Аксенов, Эдуард Григорьев, Петр Павлов, Семен Владимиров (Москва), Ньургун Александров (“Локомотив”)
65 киилэ — Виктор Рассадин, Егор Пономарев, Иван Ефремов, Дьулустаан Булатов (“Локомотив”)
70 киилэ — Константин Власов, Иван Барашков, Герман Устинов (“Локомотив”), Тимур Николаев (Москва)
74 киилэ — Айсен Копырин (Брянскай)
97 киилэ — Андрей Аронов, Ньургун Сергин (Брянскай).
Дойду чөмпүйэнээтин түмүгүнэн аан дойдуга бастыыр иһин күрэхтэһиигэ кыттар хамаанда сүүмэрдэниэҕэ.
Роман Попов, edersaas.ru