“Дохсуҥҥа” Саха сирин уонна Москва эдэр спортсменнарын табаарыстыы көрсүһүүлэрэ буола турар

 Бүгүн уонна сарсын Дьокуускайга уон үс, уон түөрт саастаах оҕолорго Саха Өрөспүүбүлүкэтин уонна Москва куорат сүүмэрдэммит хамаандаларын икки ардыларыгар остуол тенниһигэр уонна оҕунан ытыыга күрэхтэһии буолар.

Бу тэрээһин Москва спорка, туризмҥа департаменын уонна Саха Өрөспүүбүлүкэтин министиэристибэтин физическэй култуура уонна спорт эйгэтигэр бииргэ үлэлээһин туһунан сөбүлэһиилэригэр олоҕуран ыытыллар.

Остуол тенниһигэр уонна оҕунан ытыыга күрэхтэһиилэр балаҕан ыйын 26-27 күннэригэр “Дохсун” спорткомплекска буоллалар.

Саха сирин чиэһин остуол тенниһигэр алта спортсмен көмүскүүр: Владимир Кривошапкин (Чурапчы), Дмитрий Винокуров (Хатас), Айсен Афанасьев (Хаҥалас), Анита Ноговицына (Амма), Виктория Артамонова (Хаҥалас) уонна Айталина Буслаева (Хатас).

Оҕунан ытыыга өрөспүүбүлүкэ сүүмэрдэммит хамаандатыттан Петр Дьячковскай (Горнай), Ярослав Неустроев (Дьокуускай), Бэргэн Алексеев (Хаҥалас), Сааскылана Олесова (Дьокуускай), Диана Архипова (Хаҥалас), Нина Матчитова (Мэҥэ Хаҥалас), Андрей Неустроев (Дьокуускай), Артем Ким (Дьокуускай), Яков Чемезов (Дьокуускай), Любовь Никулина (“Дохсун”), Айталыына Атакова (Дьокуускай), Мила Прибылых (Дьокуускай) күрэстэһэллэр.

Роман Попов, edersaas.ru

Хаартыска Интэриниэттэн ылылынна