Дьохсоҕоннор Кыайыы 75 сылын көрсө нэһилиэктэрин тупсараллар

Бөлөххө киир:

Кыайыы 75 сылын көрсө Таатта улууһун Дьохсоҕон нэһилиэгэр тэрээһин арааһа тиһиктээхтик тэриллэн ыытыллар. Ытык дьоннорун кэриэстээн нэһилиэк олохтоохторун күүһүнэн икки сүүстэн тахса мас олордуллубут. Бу туһунан бибилэтиэкэ сэбиэдиссэйэ Галина Другина кэпсээтэ. 


—Дьохсоҕон нэһилиэгиттэн Аҕа дойду сэриитигэр кыттыбыт буойуттар сырдык кэриэстэригэр сүгүрүйэн, дьон-сэргэ, оскуола үөрэнээччилэрэ субуотунньукка турунан кытыннылар. 80 саастаах ытык кырдьаҕас,  бэтэрээн учуутал Анисья Прокопьевна Кондратьева үөрүүнэн бу тэрээһиҥҥэ кыттыста. Кини дьиэтин таһыгар үүннэрбит харыйаларыттан силигилээн тахсыбыт кыракый харыйачааннарын бар дьоммут тустарыгар диэн бэлэх уунна.

Барыта 239 мас, талах арааһа нэһилиэк киинигэр турар «Сырал тулааһына»  балаҕан тиэргэнигэр, Ленин, Үлэ Кыһыл Знамята уордьаннардаах, биллиилээх механизатор М.Н.Тихонов аатынан сынньалаҥ пааркатын тулатыгар, «Куорсун» айар түмсүү түһүлгэтигэр, ытыктыыр уонна киэн туттар биир дойдулаахтарбыт А.Е.Кулаковскай-Өксөкүлээх Өлөксөй, А.И.Софронов-Алампа сүдү мөссүөннэрин пааматынньыгар, сахалартан бастакы инженер-электрик, Саха АССР Киин Ситэриилээх Кэмитиэтин бэрэссэдээтэлэ А.К.Андреевка аналлаах сквергэ, А.П.Пинигин аатынан оранжерея таһыгар олордулуннулар. Бу мастарбыт, талахтарбыт үүнэн, чэлгийэн тахсаннар хорсун буойуттарбытын, өркөн өйдөөх ытык дьоммутун саната туруохтара диэн эрэлбит улахан. Кинилэр сырдык ааттара биһиги сүрэхпитигэр өрүү тыыннаах буолуоҕа, — диэтэ, мас олордуутун дьохсоҕоннор манан түмүктээбэккэ, 2020 сыл көмүс күһүнүгэр диэри салгыыр былааннаахтарын иһитиннэрдэ.

+1
0
+1
0
+1
0
+1
0
+1
0
+1
0
+1
0