Дьохсоҕон ыһыаҕыттан дьон үөрдэ (ВИДЕО)
Олох-дьаһах

Дьохсоҕон ыһыаҕыттан дьон үөрдэ (ВИДЕО)

Быйылгы ыһыахха күргүөмүнэн көрсүһүү, түһүлгэҕэ түмсүү, төбүрүөннээн олоруу буолбата. Күрэс, оонньуу, эҕэрдэ, ырыа-тойук, оһуохай барыта куйаар ситиминэн ыытылынна.

Ол да буоллар, дьону-сэргэни сэргэхситэр, болҕомтону тардар тэрээһиннэр ханна да балачча киэҥ хабааннаахтык ыытылыннылар. Дьон-сэргэ санаата онтон көнньүөрдэ.

Дьоһун дьонноох дьохсоҕоннорго сарсыардаттан түптэ буруота унаарда, сахалыы ырыа-тойук дьиэрэйдэ, хомус тыаһа дьүрүһүйдэ. Тиэргэн-тиэргэн аайы сахалыы сайбаччы таҥныбыт далбардар, толуу-мааны көрүҥнээх эр бэртэрэ ыһыах аһын бэлэмнээн түбүгүрдүлэр. Кыталык курдук кыргыттар, хорсун туруйа уолаттар дьонноругар көмөлөһөн илии-атах буоллулар. Сир симэҕин курдук симэммит кырачаан оҕолор сырсыакалаһа оонньоотулар. Кыынньар кымыс саамыланна, арыылаах саламаат астанна, алаадьы минньигэс сыта тиэргэни толордо. Дьэ, ол кэннэ оһуохай киэнэ бэртээхэйэ этилиннэ, куйаар ситиминэн иилэ хабан ылылынна.

Ити курдук, бүгүн күнү быһа ураты сэргэх күн турда. Нэһилиэк баһылыга Петр Захаров Дьохсоҕонун дьоһун дьонугар эҕэрдэ эриэккэһин, баҕа санаа бастыҥын тиэртэ. Ыал ахсын үөрүү-көтүү буолла, үтэһэлээх эт, бэртээхэй кымыс ыһыах кэһиитэ-тутуута буолан туттарыллынна. Куйаар ситиминэн ыытыллыбыт күөн күрэстэр кыайыылаахтара ааттаннылар, сүүйүүлээх оонньууга бааттаахтар илии тутуурданнылар, өттүк хараланнылар диэн нэһилиэк олохтоохторо үөрүүлэрин иһитиннэрдилэр.

«Алампа» аатынан норуот айымньытын дьиэтин кэлэктиибэ бэлиэтээбитинэн, күөн күрэскэ оҕолор да, улахан да дьон көхтөөхтүк кыттыбыттар. Ох курдук оҥостубут, кустук курдук куоһаммыт буоланнар, эрбии тииһин курдук эгил-тэгил киирсии буолла диэн этэллэр.

Ол курдук, «Уһун суһуох» күрэскэ кыра саастаах кыргыттарга 1 миэстэни Вика Лебедева ылбыт. 2 м. —  Амина Винокурова, 3 м. —  Аделия Саввина. Саамай кырачаан кыттааччы  Снежана Лебедева.

Оскуола оҕолоругар  Милена Макарова бастаабыт. Иккиһи —  Ира Юмшанова, үсүһү — Далаана Ючюгяева ылбыттар.

18-тан үөһээ саастаах кыргыттарга кыайыылааҕынан Анжелика Габышева-Дарамаева тахсыбыт. Иккис — Ирана Харайданова, үһүс бириистээх миэстэҕэ Сахалина Рожина тиксибит.

Уол оҕо, кыыс оҕо уонна дьиэ кэргэн сахалыы таҥаһыгар. Кыргыттарга 1 м. Анита Седалищева (эбэтэ  Акулина Седалищева тикпит). 2 м. Виолетта Габышева (ийэтэ Людмила Габышева тикпит). 3 м.  Мия Харайданова (Лидия Сивцева тикпит).

Уол оҕо таҥаһыгар 1 м. Эрчим Пермяков.

Бастыҥ иистэнньэҥ Лидия Сивцева буолбут.

«Бастыҥ сандалы» күөн күрэһигэр Мария Макарова кыайыылааҕынан тахсыбыт. Иккиһи  Анна Жараева, үсүһү Матвеевтар дьиэ кэргэн ылбыттар.

«Бастыҥ тиэргэн» күрэхтэһиигэ кыайыылаах аата сэрии сылын оҕотугар Анна Жараеваҕа бэриллибит.

«Киин» түөлбэ олохтоохторо ыһыахтаатылар. Видеоны Виктория Васильева таҥан оҥордо.

 

 

 

 

 

 

 

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

5 × 3 =