Айар тыл аҕата А.Е.Кулаковскай төрөөбүтэ 145 сылын көрсө өрөспүүбүлүкэтээҕи күрэс дьоһун Дьохсоҕоҥҥо буолла.
Таатта улууһугар Боробул бөһүөлэгэр Уураахха (күөл) Давид Поликарпович Габышев, Василий Васильевич Тистяхов көҕүлээһиннэрин, нэһилиэк баһылыга Петр Егорович Захаров өйөөн икки күн устата муус, хаар оҥоһуктарга өрөспүүбүлүкэтээҕи күрэс ыытылынна. Күөн күрэс буолуон иннинэ, ытык сири «Эйгэ» сиэр-туом бөлөҕүн далбардара ыраастаабыттарын кэнниттэн, СӨ култууратын үтүөлээх үлэһитэ, алгысчыт Афанасий Николаевич Попов алгыс сиэрин-туомун оҥордо.
Күөн күрэс киэҥ нэлэмэн түһүлгэтигэр Өлүөхүмэттэн, Сунтаартан, Үөһээ Бүлүүттэн, Мэҥэ Хаҥаластан, Намтан, Тааттаттан барыта 10 уус түмсэн илин-кэлин түһүстэ.
Хаартан оҥоһук көҥүл тиэмэҕэ, онтон мууска Өксөкүлээх Өлөксөй айымньыларыттан үлэлэр оҥоһуннулар. Дьэ, кылбаа маҥан хаартан, курустаал таастыы күлүмүрдээн көстөр дьэҥкир муустан бииртэн-биир кэрэ айымньы манна айыллан, ураты оҥоһук манна чочуллан таҕыста!
Күөн күрэһи дьүүллүүр сүбэ Чярин Федор Иванович, Татаринов Иннокентий Хрисанфович, Тарабукин Эдуард Эдуардович, Бысыина Виктория Прокопьевна, Саввин Евгений Егорович буолан сыныйан көрдүлэр-иһиттилэр. Киэһээ Алампа аатынан кулууп дьиэҕэ кыайыылаахтары наҕараадалааһын үөрүүлээх чааһа буолла.
Бириистэри биэриигэ «Охотный двор» маҕаһыын (сал. Ю.Н.Большаков), нэһилиэк дьаһалтата (баһылык П.Е.Захаров), биир дойдулаахтарбыт, улуус мунньаҕын сэбиэтин бэрэссэдээтэлэ В.А.Охотин, Таатта улууһун баһылыгын 1-кы солбуйааччы И.И.Потапов спонсордаатылар. Кыайыылаахтарга, кыттыбыттарга махтал суруктар, сыаналаах бириистэр туттарылыннар. Ол курдук Афанасьев Леонид Никифорович (Үөһээ Бүлүү) «Бастыҥ көҕүлээччи» анал ааты ылла, «Охотный двор» маҕаһыынтан 10 тыһ. сэртипикээти тутта. Степанов Николай Прокопьевичка (Таатта) «Көрөөччү биһирэбилэ» анал аат бэрилиннэ уонна «Охотный двор» маҕаһыынтан 10 тыһ. сэртипикээти ылла. Габышев Айсиэн Кирилловичка (Өлүөхүмэ) «Баараҕай оҥоһук» анал аат уонна мультиварка, Марков Дьулус Петровичка «Дириҥ ис хоһоонноох оҥоһук» анал аат уонна шуруповерт-лобзик Makita, Никифоров Аян Викторовичка (Мэҥэ Хаҥалас) «Чочуонай оҥоһук» анал аат уонна саабыла эрбии, Назаров Василий Александровичка (Таатта) «Алыптаах хаар оҥоһук» анал аат уонна күлүүс набора туттарылыннылар. Үһүс бириистээх миэстэҕэ Суздалов Николай Иннокентьевич (Нам) таҕыста, «Охотный двор» маҕаһыынтан 20 тыһ. сэртипикээтинэн наҕараадаланна. Иккис бириистээх миэстэни Попов Василий Еремеевич (Таатта) ылла уонна «Охотный двор» маҕаһыынтан 25 тыһ. сэртипикээти тутта. Бастакы миэстэ Охлопков Максим Васильевичка (Сунтаар) бэрилиннэ уонна эмиэ «Охотный двор» маҕаһыынтан 30 тыһ. сэртипикээтинэн наҕараадаланна. Кылаан чыпчаал үрдүк аатын Аргунов Василий Артемьевич (Нам) ылары ситистэ уонна киниэхэ 2022 с.т. убаһа сэртипикээтин нэһилиэк баһылыга Петр Егорович Захаров туттарда.
Икки күннээх күөн күрэс кыттыылаахтара үөрэн-көтөн туран харда тыл эттилэр, эрбии тииһин курдук илин-кэлин түсүһүүлээх, тиритиилээх-хорутуулаах, долгутуулаах күннэргэ итии аһынан аһаппыт дьаһалта, кулууп, бибилэтиэкэ кэлэктииптэригэр, гарааһынан хааччыйбыт «Победа» ТЭХ салайааччытыгар Саввин М.И. махтаннылар. Тэрээһинтэн олус астыммыттарын биллэрдилэр. Түгэнинэн туһанан хаар кутуутугар, миэстэни ыраастааһыҥҥа саамай улахан көмөнү нэһилиэкпит дьокутаата Иннокентий Иннокентьевич Другин бэйэтин тыраахтарынан хас эмэ күн үлэлээн оҥорбутугар уонна күөн күрэһи тэрийэргэ тирэх, өйөбүл буолбут, көмөлөспүт спонсордарбытыгар тэрийээччилэр ааттарыттан махтал истиҥ тылларын этэбит.
Изабелла Жараева,
Алампа аатынан норуот айымньытын дьиэтин дириэктэрэ.
Хаартыскалар, видео И.Жараева тиксэриилэрэ