Таатта улууһун дьоһун дьонноох Дьохсоҕонугар бүгүн сахаттан бастакы инженер-теплоэнергетик, САССР коммунальнай хаһаайыстыбатын бастакы наркома, Дьокуускайдааҕы электростанция дириэктэрэ, киэн туттар биир дойдулаахтарын Ананий Кононович Андреев төрөөбүт-үөскээбит сиригэр-уотугар анаан тутуллубут скверигэр СӨ Судаарыстыбаннаһын күнүгэр аналлаах үөрүүлээх миитин буолла.
Бу үөрүүлээх уонна улахан долгутуулаах күн СӨ ОДьКХ генеральнай дириэктэрин солбуйааччы Ж.С.Бурцев, Таатта улууһун аҕа баһылыгын солбуйааччылара И.И.Потапов, М.И.Эртюков, СӨ ОДьКХ Тааттатааҕы филиалын дириэктэрэ Д.Д.Павлов, СӨ ОДьКХ музейын сэбиэдиссэйэ Г.Е.Арылахова, Тааттыыныскай нэһилиэк аҕа баһылыга Е.И.Павлов, уо.д.а. ыалдьыттаатылар.
Ыҥырыылаах ыалдьыттар ытык киһи скверигэр гирлянда уурбуттарын кэнниттэн, тэрээһин түһүлгэтигэр мустубут дьон бука бары сүһүөхтэригэр туран «Өрөгөй ырыатын» ыллаан ньиргиттилэр. Эҕэрдэ тыллар, үлэҕэ-хамнаска туһаайыллыбыт сырдык санаалар этилиннилэр. Салгыы СӨ ОДьКХ олохтообут анал истипиэндьийэтин быйыл «Инфраструктурнай технологиялар кэллиэстэригэр» техническэй үөрэх үһүс кууруһугар ситиһиилээхтик үөрэнэр Айыына Толстяковаҕа дохсун ытыс тыаһынан арыаллаан туттардылар. Үөрүүлээх тэрээһини, өрүү буоларын курдук, «Таатта» олохтоох телеустуудьуйата уһулла.
Нэһилиэк олохтоохторо, оскуола үөрэнээччилэрэ, ыҥырыылаах ыалдьыттар тэрээһинтэн сүргэлэрэ улаханнык көтөҕүллэн, үөрэн-көтөн тарҕастылар.