Мэҥэ Хаҥалас улууһун Догдоҥо нэһилиэгин дьаһалтата сыстыганнаах дьаҥ кэмигэр бэйэтин биир дойдулаахтарын өйүү олорор.
edersaas.ru
Ол курдук, соторутааҕыта олохтоох дьаһалта баһылыга Иван Новгородов олохтоох биэлсэр пуунугар 10 устуука дьаҥтан харыстанар элбэхтэ кэтиллэр анал көстүүм, икки сыстыганнаах ыарыыттан харыстанар ачыкы, 10 спиро-респиратор, 40 мэдиссиинискэй халаат ылан биэрдэ.
Бу олус наадалаах бэлэҕин баһылык тэрилтэ салайааччылара нэдиэлэтээҕи былаанныыр мунньахтарыгар олохтоох фельдшер Иван Пивоваровка туттарда.
Онтон бу күннэргэ олохтоох дьаһалта эр дьоно Байанай ыйын чэрчитинэн сэрии сылын оҕолоругар, нэһилиэк аҕам саастаах дьонугар анаан муҥхалаатылар.
Онон кырдьаҕас дьоҥҥо төрөөбүт дойдуларын соботун амсатан күндүлээтилэр.
Култуура үлэһиттэрэ Бөкө нэһилиэгин 20 ыалыгар үөрдэ-көтүтэ дьаһалта өйөбүл оҥорбут күндү аһын түҥэттилэр.
Ити курдук олохтоох дьаһалта бу уустук кэмҥэ нэһилиэк олохтоохторун өйүү олорор.
Елена ПОТОЦКАЯ, «Саха сирэ» хаһыат, edersaas.ru
Хаартыска — «Догдоҥо нэһилиэгэ» МТ инстаграмыттан