“Үтүө чороон” диэн анал бырайыагынан волонтер Антон Васильев атын регионнарга тахсар санаалаах. Бу туһунан кини бүгүн Ил Дархан Егор Борисов волонтердары кытары көрсүһүүтүгэр иһитиннэрдэ.
Билэргит курдук, быйыл Россияҕа баҕа өттүнэн дьоҥҥо үтүөнү оҥоруу сылынан биллэриллибитэ. Маннык хамсааһын биһиэхэ урут-уруккуттан баар. Уопсастыбаннай түмсүүлэри таһынан биирдиилээн дьон күүскэ дьарыктаналлар. Оннук дьонтон биирдэстэринэн Антон Васильев буолар. Кини аҕыйах сыллааҕыта “Үтүө чороон” диэн анал бырайыагы толкуйдаан улуустарынан көмөнү тэрийбитэ.
“Бу бырайыагынан чороону туппут улуустар атын улуустарга көмөлөһөллөр. Холобур, сунтаардар ньурбаларга, ньурбалар үөһээ бүлүүлэргэ көмөлөспүттэрэ. Олунньуга Бүлүү улууһа эстафетаны Эдьигээҥҥэ ыытыаҕа. Ону сэргэ хотугу улуустарга, Россия таһымыгар тахсан атын регионнары хабыахпын баҕарабын. Холобур, Саха сирин олохтоохторо Свердлов уобалаһыгар көмөлөһүө этибит. Бу чороону Свердлов уобалаһа салгыы атын регионнарга ыытан иһиэҕэ. Хас биирдии региоҥҥа көмө оҥороругар 10 хонук бэриллэр”, — диэн иһитиннэрэр Антон Васильев.
Антон этиитин түмүгэр бырабыыталыстыбаны көмөҕө ыҥырда. Манна Егор Афанасьевич: “Мин кэргэмминээн Прасковья Петровналыын араас акцияҕа, тэрээһиҥҥэ кыттабыт, көмөлөһөбүт. Ол туһунан кэпсии сылдьыбаппыт. Үтүөнү оҥоруу киһи ис сүрэҕиттэн тахсыахтаах. Бэлиитикэтэ суох. Үтүөнү оҥоруу диэн өйдөбүл хас биирдии киһиэхэ киирэрин курдук үлэни ыытыахха”, — диэн бэлиэтээтэ.
Аграфена КУЗЬМИНА, “Саха сирэ” хаһыат, edersaas.ru.