«Саамай ирдэбиллээх көрөөччүлэр — оҕолор» диэн артыыстартан, ырыаһыттартан үгүстүк истэр этим. Бу сырыыга маннык бэргэн этиини «Добрая Якутия» уопсастыбаннай хамсааһын волонтердарыттан иһиттим.
Өрөспүүбүлүкэҕэ сүрдээх элбэх уопсастыбаннай тэрилтэ баара биллэр. Аҥардас регистрацияламмытынан хас да тыһыынчаҕа тиийэр эрээри, дьиҥ үлэлии сылдьааччыта олох аҕыйах. Олортон биирдэстэрэ – «Добрая Якутия» хамсааһын буолар. Баҕар, сорох дьон, бу хамсааһыны ойуччу ылан тоҕо өрө туттулар дии саныаххыт. Ол эрээри бу хамсааһын икки ый анараа өттүгэр саҥа тэриллэн баран, номнуо сүрдээх элбэх тэрээһиннэри ыытта. Барыта оҕо мичээрин, үөрэ-көтө сылдьарыгар анаан оҥордо.
Уопсастыбаннай хамсааһын волонтердара Дьокуускай куорат коррекционнай оскуолаларын, оҕо дьиэлэрин, ыарахан балаһыанньаҕа киирбит ыаллары кытары үлэлииллэр, көмөлөһөллөр.
Ааспыт ыйга волонтерскай хамсааһын көҕүлээһининэн, Дьокуускайга «Папа, Мама, Мы – спортивная семья» күрэхтэһии ыытыллыбыта. Манна 2-с нүөмэрдээх өрөспүүбүлүкэтээҕи коррекционнай оскуола-интэринээт хамаандалара кыттыбыттара. Онтон куораттааҕы «Мы едины» күрэххэ 34-с нүөмэрдээх оскуола-интэрнээт оҕолоро бастакы миэстэни ылары ситиспиттэрэ. Бу оҕолору уопсастыбаннай хамсааһын волонтердара – Арктикатааҕы култуура институтун устудьуоннара үҥкүүгэ үөрэппиттэрэ.
Бу туһунан Арктикатааҕы култуура институтун устудьуоннара оскуола-интэринээт иитиллээччилэрин үҥкүүлүүргэ, ыллыырга үөрэтэллэрин туһунан «Россия ыччатын сойууһа» уопсастыбаннай хамсааһын Саха сиринээҕи бэрэстэбиитэлистибэтин бэрэссэдээтэлэ Александра Семенова кэпсиир.
Бу күннэргэ Москваттан «Даниловцы» Россиятааҕы уопсастыбаннай тэриллии салайааччыта Юрий Белановскай уопут атастаһа, федеральнай уопсастыбаннай волонтерскай хамсааһыннар хайдах хабааннаахтык үлэлии сылдьалларын туһунан билиһиннэрэ кэлэ сылдьан: «Бу саҥа тэриллибит хамсааһыҥҥа 120-тэн тахса волонтер баҕа өттүнэн үлэлии сылдьаллара хайҕаллаах. Ыарыһах, инбэлиит, тулаайах хаалбыт оҕолорго аҥардастыы материальнай көмө наадатын таһынан, оҕону аралдьытыахха, кэпсэтиэххэ наада. Маннык оҕолор наһаа соҕотохсуйаллар», – диэн иһитиннэрдэ.
Онон волонтер устудьуоннар, оҕолор сүрэхтэрин сылааһын, болҕомтолорун, сыраларын аныы сылдьалларыттан үөрүөх тустаахпыт. Волонтердар инники былааннара киэҥ. Эһиилгиттэн улуус оскуолаларын кытары үлэлэһэр, атын уопсастыбаннай тэрилтэлэри кытары ыкса үлэлэһэр соруктаахтар.
Анивера АКИМОВА.