Маны аах Үөрэх уонна наука

Дьоҕус наука академиятыгар ураты лабораториялар баар буолуохтара

Хаҥалас улууһун Өктөм сэлиэнньэтигэр үлэлиир дьоҕус наука академиятын саҥа үөрэнэр куорпуһугар ураты лабораториялар баар буолуохтара.

Ол курдук аэрокосмическэй инженерия, биотехнология, молекулярнай диагностика, палеонтология уонна археология, ону сэргэ үөрэтиилэри ыытар полигоннары оҥоруохтара. Бу саҥа тэриллэр барыта «Үөрэҕирии» национальнай бырайыак чэрчитинэн ылылыннылар. 150 миэстэлээх үс этээстээх үөрэтэр киин, 100 миэстэлээх интэринээт бу дьыл сэтинньитигэр үлэҕэ киирэрэ былааннанар. Үөрэтэр кииҥҥэ уопсайа сэттэ лаборатория үлэлиэҕэ. Маны сэргэ ДНК лабораториялаах биотехнология киинэ үлэлиэҕэ. Оҕолорго аналлаах IT киин, Коворкинг-киин, телестудия, массаастыыр кэбиниэттээх успуорт саалата былааннанар. Оҕолору олохсутар интэринээт үөрэнэр киини кытта силбэһэ турар буолар. Сүрүн уратынан аһаҕас халлаан анныгар үлэлэри ыытар полигоннары тутуу. Ол курдук альтернативнай энергетика, климотология, Роснефть уонна ракетодром баар буолуоҕа. Маны сэргэ, талааннаах оҕолору талан ылар аналлаах эрэгийиэннээҕи киин тутуллуоҕа. Үөрэх киинин бастакы сыбаайата 2017 сыллаахха түспүтэ. Дьиҥэ, болдьох быһыытынан тутуу үлэҕэ былырыын киириэхтээх этэ. Саҥа куорпус үлэҕэ киирдэҕинэ элбэх оҕо үөрэнэр, билиитин хаҥатынар усулуобуйата тупсуохтаах уонна элбэх миэстэ тахсыахтаах.
Ульяна ЗАХАРОВА.

0
0