Өрөспүүбүлүкэҕэ дьоҕус бизнеһи сайыннарыыга үс боппуруос быһаарыллыахтаах. Бастакытынан, инвестиционнай килиимэти тупсарыы. Иккиһинэн, административнай барьердары суох оҥоруу. Үсүһүнэн, урбаанньыттары өйөөһүн.
СӨ Ил Дархана Егор Борисов Ил Түмэн дьокутааттарын уонна уопсастыбаннас иннигэр Анал этиитигэр урбаан салаатын боппуруостарын сайыннарыыга эмиэ тохтоото. Онуоха, былырыыҥҥы этиитигэр олохтоох оҥорон таһаарыыны сайыннарыыга сүрүн болҕомтотун уурбутун санатан ааста. Ол курдук «Саха сиригэр оҥоһулунна» диэн бырайыак олоххо киирэн, маҕаһыыннарга олохтоох оҥорон таһаарааччылар бородууксуйалара хото атыыланар буолла. Сорох атыы-эргиэн кииннэригэр анал долбуурдар баар буоллулар.
«Ырыынакка барымтыа табаары оҥорон таһаарааччыларга болоҕомто күүһүрүөхтээх. Аҥаардас өрөспүүбүлүкэ иһигэр эрэ буолбакка, таска таһаарыыга эмиэ үлэлиэхтээхпит», – диэн Ил Дархан алмааһы кырыылыыр, ювелирнай салаалары, туризмы сайыннарыы туһунан бэлиэтээн эттэ. Манна анаан экспортнай киин тэриллиэхтээх.
РФ бэрэсидьиэнэ Владимир Путин дьоҕус бизнеһи сайыннарыыга үлэ ыытан, эрэгийиэннэргэ эмиэ улахан суолта бэрилиннэ.
Анивера АКИМОВА, edersaas.ru