Бэҕэһээ, балаҕан ыйын 18 күнүгэр, Уус Амма нэһилиэгин култууратын үлэһиттэригэр аналлаах искибиэр аһылынна.
Искибиэр биир дойдулаахпыт Эдуард Герасимович Тарабукин үтүө аатыгар ананна. Бу бэлиэ тутууга нэһилиэк култууратын сайдыытын кэрчиктэрин көрдөрөр икки истиэндэлээх, баяннаах, ыскамыайкалаах. Үйэлээх тутууну Эдуард Герасимович бииргэ төрөөбүт быраата, Саха Өрөспүүбүлүкэтин Ытык аҕата, Уус Амма нэһилиэгин бочуоттаах гражданина Тарабукин Петр Герасимович, кини табаарыһа Татаринов Г.Х. уонна норуот маастара Тарабукин Э.Э. оҥордулар.
Искибиэри арыйыыга Римма Герасимовна убайын туһунан истиҥ тыллары эттэ, киниэхэ анаан таһаартарбыт брошюралары Эдуард бииргэ үөрэммит доҕотторугар, чугас ыалларыгар, библиотекаҕа, култуура дьиэтигэр бэлэхтээтэ.
Үөрүүлээх түгэни Тааттатааҕы оҕо искусствотын оскуолатын дириэктэрэ Д.А.Попова кырыымпанан, А.Павлов баянын доҕуһуолларынан, биир дойдулаахтарбыт Федорова Р.Г., Новгородова А.А., Максимов В.З. уонна Атастыров Н.Н. мелодиятыгар «Чымынаайыбын таптыыбын» ырыанан сиэнэ Винокурова Сардаана астылар.
Эдуард Герасимович уола Эдуард Эдуардович тэрээһиннэргэ анаан саха быһаҕын уонна икки хомуһу спонсордаата. Эдуард Герасимович оҕолоругар, бииргэ төрөөбүттэригэр, үйэлээх өйдөбүнньүгү бэлэхтээбиттэринэн махтанабыт, чэгиэн доруобуйаны, ситиһиилэри баҕарабыт.
Уус Амматтан бэтэрээн сэбиэтин бэрэссэдээтэлэ Антонина Григорьева, «Саха сирэ», edersaas.ru сайтка анаан.