«Олоҥхо дойдутун прессата» бэстибээл чэрчитинэн, Бэчээт дьиэтигэр элбэх кэрэхсэбиллээх тэрээһиннэр, быыстапкалар ыытылыннылар.
Тустаах үлэлэригэр сөбүлүүр дьарыктарын дьүөрэлэһиннэрэр саха араадьыйатын суруналыыстара биир идэлээхтэригэр бэйэлэрин кэллиэксийэлэрин көрдөрдүлэр. Омук сиринэн айанныырын сөбүлүүр Альбина Тарабукина сылдьыбыт дойдуларыттан куруускалары, дьоҕус сувенирдары аҕалбыта итиэннэ альбом кинигэлэри мунньубута бэйэтэ улахан кэллиэксийэ буолбут. Суруналыыстар дэлэгээссийэлэригэр киирэн, 1996 с. Америкаҕа бара сылдьан, уолугар Валераҕа АХШ оччотооҕу Бэрэсидиэнэ Билл Клинтон ойуулаах аккырыыкканы ыыппыт эбит.
Валентина Атласова оҕо эрдэҕинэ саҕалаабыт дьарыгын бырахпатах. Хомуйбут мааркалара хас да альбом буолбуттар!
Екатерина Голикова мунньубут слоннара элбэҕэ сөхтөрдө.
Татьяна Степанова маастар Никифоров сэлии муоһунан дьүһүйбүт оҥоһуктарын мунньубута сыаната биллибэт кылаат буолбут.
Раиса Сибирякова, Саха сирэ” хаһыат, edersaas.ru.