Уус Алдан улууһа доҕордуу сибээһин бөҕөргөтөр.
РФ Тыа хаһаайыстыбатын министиэристибэтэ тэрийбит тыа сирин сайыннарыы икки күннээх бырагырааматын чэрчитинэн, улуус дэлэгээссийэтэ Владивостокка баран кэллэ. Бу сырыытыгар дэлэгээссийэ Уһук Илиҥҥи федеральнай уокурукка Саха сирин бастайааннай бэрэстэбиитэлэ Георгий Никоновы кытары көрүстэ.
Дэлэгээссийэ салайааччыта, Уус Алдан улууһун баһылыгын бастакы солбуйааччы Петр Попов тыа сирин территориятын сайыннарыы кууруһугар кыттыыларын, көрсүһүү норуоттар уонна эрэгийиэннэр икки ардыларынааҕы бииргэ үлэлээһин эйгэтигэр туһатын сырдатта. Дэлэгээссийэҕэ улуус экэниэмикэҕэ управлениетын начаалынньыга Евгений Дедюкин, үпкэ управлениетын начаалынньыга Петр Бурнашев кыттыыны ыллылар.
Манна даҕаттахха, бастайааннай бэрэстэбиитэлистибэ Уус Алдан улууһун кытары сөбүлэһиигэ олоҕуран каадырдары бэлэмнээһин боппуруоһугар, инвестордары тардыыга, араас хайысхаларга атын субъектар муниципалитеттарын кытары үөрүйэҕи атастаһыыга үлэлэһэр. Көрсүһүүгэ 2015 сыллаахха Харбиҥҥа Арассыыйа-Кытай ЭКСПО-тыгар бырааттыы сыһыаны олохтуур туһунан кэпсэтии ыытыллыбытынан, улуус КНР Фуюань куоратын кытары доҕордуу сыһыанын кэпсэттилэр.
Улуус бу хайысхаҕа үлэни көхтөөхтүк тэрийэр. Коронавирус дьаҥын бохсууга хардарыта өйөһүү, кыһалҕалаах кэмҥэ гуманитарнай көмөнү оҥорон мэдиссиинэ мааскаларын ыытыы тэриллибитэ. Маны сэргэ, Уус Алдан улууһа тыа хаһаайыстыбатын хайысхатыгар, нэһилиэнньэтинэн да, структурнай тэрилтэтинэн да чугас Амур уобалаһын Ивановскай оройуонун кытары ыкса сибээһи тутар.
Хардарыта сибээстээх үлэ экэниэмикэ, култуура, успуорт эйгэтин сайыннарарга, ыччат үлэтигэр, үөрэххэ, үөрүйэҕи атастаһарга, билиини-көрүүнү хаҥатарга, доҕордуу сыһыаны олохтуурга улахан суолталаах.
+1
+1
+1
+1
+1
+1
+1