«Доҕордоһуу уонна сомоҕолоһуу үҥкүүтэ» күөн күрэс түмүктэннэ.
А.Е.Кулаковскай аатынан норуоттар доҕордоһууларын дьиэтигэр норуоттар Ассамблеяларын уонна Саха сирин национальнай түмсүүлэрин өрөспүүбүлүкэтээҕи күөн күрэһин түмүктүүр улахан кэнсиэрэ буолла. Күөн күрэс Өлүөхүмэҕэ ыытыллар «Олоҥхо ыһыаҕа-2021» бырааһынньыкка ананна диэн А.Е.Кулаковскай аатынан норуоттар доҕордоһууларын дьиэтин пресс-сулууспата иһитиннэрдэ.
Күөн күрэһи Өлүөхүмэ улууһун дьаһалтатын өйөбүлүнэн «Өлүөхүмэ оройуонун Ассамблеята» уонна А.Е.Кулаковскай аатынан норуоттар доҕордоһууларын дьиэтэ тэрийдилэр.
Бииртэн-биир чаҕылхай толорууларынан Нерюнгри, Хаҥалас, Өлөөн, Өлүөхүмэ, Дьокуускай үҥкүүһүттэрэ көрөөччүлэрин үөртүлэр. Күөн күрэс икки түһүмэҕинэн: кэтэхтэн уонна очнай киэбинэн ыытылынна. Оттон түмүккэ СӨ Тас сибээскэ уонна норуоттар дьыалаларыгар министиэристибэ анал бирииһин «Арарат» уопсастыбаннай түмсүү (Дьокуускай) кэлэктиибэ ылла. Көрөөччүлэр биһирэбиллэрин уонна 5000 солк. суумалаах сэртипикээти Өлүөхүмэ оройуонун дьаһалтатыттан, А.Е.Кулаковскай аатынан норуоттар доҕордоһууларын дьиэтэ инстаграмынан куоластааһын (лайк туруоруутунан) ыыпптынан, Мииринэй куораттан «Байкал» национальнай түмсүү тутта. Гран-при үрдүк аатын уонна 10.000 солк. сэртипикээт «Арктика» ( Нерюнгри) оскуола кэлэктиибигэр туттарылынна. Маны сэргэ, СӨ Тас сибээскэ уонна норуоттар дьыалаларыгар министиэристибэ Нерюнгриттан кыттыбыт талааннаах Гавриил Суздаловка бэлэх туттарда. Бары кыттааччыларга «Доҕордоһуу уонна сомоҕолоһуу үҥкүүтэ» өрөспүүбүлүкэтээҕи күөн күрэс дипломнара бэрилиннилэр. Улахан кэнсиэри «Сюрприз» уонна «Грация» үҥкүү ансаамбыллара ситэрэн-хоторон биэрдилэр.
«Доҕордоһуу уонна сомоҕлоһуу үҥкүүтэ» күүтүүлээх дьоро киэһээ хас биирдии нүөмэр дохсун ытыс тыаһынан арыалланна.