Дьокуускайга А.Е.Кулаковскай аатынан норуоттар доҕордоһууларын дьиэтигэр Muus uSTAR бэстибээл иитинэн, «Доҕордоһуу суолунан» диэн этно-квест бэрт сэргэхтик ыытылынна.
Бу бэртээхэй тэрээһини СӨ норуоттарын эдэр ыччатын Ассамблеята СӨ Тас сибээскэ уонна норуоттар дьыалаларыгар министиэристибэ өйөбүлүнэн тэрийдэ диэн А.Е.Кулаковскай аатынан норуоттар доҕордоһууларын дьиэтин пресс-сулууспатыттан иһитинэрдилэр. Тэрээһин «Muus uSTAR» бэстибээл кыттыылаахтарын уонна ыалдьыттарын Саха сиригэр олорор норуоттар култуураларын, үгэстэрин, фольклордарын билиһиннэрэр, доҕордуу буолууну, сомоҕолоһууну бөҕөргөтөр сыаллаах-соруктаах ыытылынна. Манна квест кыттааччылара ханан сылдьыахтаах суоллара ыйыллыбыт лииһинэн сирдэтэн, ыстаансыйаларга тиийэллэр уонна араас сорудахтары толороллор, оонньууларга кытталлар, тургутуктарга хоруйдууллар. Тэрээһин кыттыылаахтара улаханнык сэргэхсийдилэр, көнньүөрдүлэр, өйдүү-саныы сылдьарга бэлэхтэри туттулар.