Сахабыт сиригэр кырыа кыһыммыт ааһан, сандал саас кэлэн, күн уһаан, киһи таһырдьаттан киирбэт үтүө кэрэ кэмнэрэ кэллилэр.
Быйыл Сахабыт Сиригэр ураты бэлиэ суолталаах, улахан үбүлүөйдээх сыл буолар. Ол курдук муус устар ый 27 күнүгэр Саха Автономнай Советскай Социалистическай Өрөспүүбүлүкэ тэриллибитэ 100, Дьокуускай куорат уонна Саха сирэ Арассыыйа судаарыстыбатын састаабыгар киллэриллибитэ 390 сылларын улаханнык долгуйан туран бэлиэтиэхпит. Саха норуодунай суруйааччыта, Социалистическай үлэ геройа Дмитрий Кононович Сивцев – Суорун Омоллоон Суоттуга төрүттээбит “Доҕордоһуу” музейа тэриллибитэ бу сайын 35 сыла туолар уонна быйыл Арассыыйа норуоттарын култууратын үйэлээх баайын сыла.
Бу сүдү Саха норуотун кэскилин, сайдыытын, инникитин төлкөлөөбүт политическай суолталаах событияларынан сибээстээн, муус устар ый саҥатыгар доруобуйаларынан хааччахтаах дьону (инбэлииттэри) үлэнэн хааччыйар уонна үлэлэтэр, нэһилиэнньэҕэ олус туһалаах наадалаах бородууксуйалары онорор Социальнай тэрилтэлэр “Заря” уонна “Сайдыы” кэлэктииптэрэ 390 сыл анараа өттүгэр Дьокуускай куорат ааҥ-маҥнай төрүттэммит сиригэр, Өлүөнэ эбэбит уҥа кытылыгар, Суоттутааҕы “Доҕордоһуу” музейыгар баран ыалдьыттаан кэллибит. Уопсайа 23 буолан музей бары экспонаттарын, тутууларын олус сэҥээрэн, кэрэхсээн көрдүбүт, араас аттракционнарын боруобалаан дуоһуйа сынньанан, сибиэһэй салгынынан тыынан олус сэргэхсийэн кэллибит. Түгэнинэн туһанан, доруобуйаларынан хааччахтаах дьон сынньаналларын бу курдук өрүү тэрийэн көмөлөһөр “Доҕордоһуу” музейын амарах санаалаах үлэһиттэригэр, салайааччы Надежда Яковлевна Новоприезжаяҕа махталбытын тириэрдэбит. Араас сырыыларбытыгар өрүүтүн транспорт биэрэн көмөлөһөр СӨ Бырабыыталыстыбатын автобазатын дириэктэригэр Гаврил Юрьевич Федоровка уонна бу тэрээһиннэри барытын өр сылларга тэрийэр, көҕүлүүр бэчээт уонна социальнай эйгэҕэ үлэлиир тэрилтэбит салайааччытыгар Николай Гаврильевич Местниковка барҕа махталбытын биллэрэбит.
“Доҕордоһуу” музейа олус улахан суолталааҕа, култуура бары көрүҥнэрэ күүскэ сайдан, кэҥээн аан дойдуга биллэн-көстөн иһэриттэн биһиги киэн туттабыт. “Доҕордоһуу” музейыгар түҥ былыргыттан билиҥҥи кэмҥэ диэри саха норуотун культуратын, олоҕун сайдыытын көрдөрөр баай экспонаттары мунньан норуокка чахчы туһалаах, кэрэхсэбиллээх үлэни ыыталлара көстөр. Ону салгыы харыстыыр, хараанныыр үлэни үчүгэй тэрээһиннээхтик ыытаргытыттан үөрэбит уонна биһириибит.
Эрэнэбит, “Доҕордоһуу” музейын айар-сайыннарар үлэһиттэрэ өссө да саҥа сүүрээннэри киллэрэргэ бэлэмнэр уонна бу быйыл сайын тэриллибиккит 35-с сылын туолуутун үтүө-кэрэ үлэлэрдээх көрсүөххүт!
Бары “Доҕордоһуу” музейыгар сыһыаннаах үлэлэри өрө тутааччыларга айар ситиһиилэри-хотуулары баҕарабыт, оттон туристарга уонна ыалдьыттарга – умнуллубат үчүгэй санаалар үөскүүллэригэр итиэннэ уһулуччулаах умсулҕаннары!
Н.Н.Корнилов-Сардаҥа,
РФ суруналыыстарын сойууһун чилиэнэ, РФ Нуучча географическай уопсастыбатын чилиэнэ, кыраайы үөрэтээччи
Хаартыскалар Н.Корнилов-Сардаҥа тиксэриилэрэ.