Япония Хабаровскайга вице-консула Мородоми Манабу Дьокуускайга кэллэ диэн СӨ тас дойдулары кытары сибээскэ департаменын пресс-сулууспата иһитиннэрэр.
Вице-консул Япония уонна Саха сирэ бииргэ үлэлиир бырайыактарын олоххо киллэриини сиһилии билсибит, Япония сыла Арассыыйаҕа, Арассыыйа сыла Японияҕа ыытылларынан тэрээһиннэри бииргэ оҥоруу туһунан кэпсэппит. Экономическай сайдыы боппуруостарыгар ыкса сибээстээх үлэлээһини күүһүрдүүнү, салгыы сайыннарыыны дьүүллэспиттэр.
Ыалдьыт СӨ экономика, СӨ ОДьКХ уонна энергетика министиэристибэлэригэр, Дьокуускай куорат дьаһалтатыгар сылдьыбыт. Миниистир бастакы солбуйааччытын Николай Дураевы кытта икки дойду кыттыгас бырайыактарын дьүүллэспиттэр. Николай Никифорович түгэнинэн туһанан, Тиксиигэ тыал күүһүн туһанар парканы тутууга улахан өйөбүллэрин иһин Япония консульствотыгар махтаммыт, үлэ хаамыытын сырдаппыт. Көрсүһүүгэ генеральнай дириэктэри бастакы солбуйааччы – “Якутскэнерго” ПАУо кылаабынай инженерэ Сергей Гаврилов, “Сахаэнерго” АУо генеральнай дириэктэрэ Алексей Ивлев кыттыбыттар.
Мородоми Манабу Дьокуускай куорат уокуруктааҕы дьаһалтатыгар көрсүһүүтүн кэнниттэн, дэлэгээссийэ салгыы «Кангалассы» ТОР уонна “Саюри” ХЭУо сылы быһа үлэлиир тэпилииссэтигэр сылдьан үлэни-хамнаһы билсибит.
СӨ экономика министиэристибэтигэр инвестиционнай бырайыактары хамсатыыны, Саха сирин кытта бииргэ үлэлээһини салгыыр туһунан о.д.а. кэскиллээх боппуруостары дьүүллэспиттэр.
Санатан эттэххэ, былырыын от ыйыгар, 2018 сылга Арассыыйа уонна Япония сылларын хардарыта ыытар туһунан РФ Бэрэсидьиэнин дьаһала тахсыбыта. Итиннэ экономика, култуура, наука, үөрэх, спорт боппуруостарыгар, муниципальнай тэриллиилэр үөрүйэҕи атастаһалларыгар, о.д.а. икки дойду интэриэһин таарыйар далааһыннаах тэрээһиннэр былааннаммыттара.
Быйыл муус устарга Дьокуускай куоракка дзюдоҕа Ямагата, Япония спортсменнарын кытары табаарыстыы көрсүһүү буолуохтаах. Онтон ыам ыйыгар Туймаада хочотугар Япония Хабаровскайдааҕы Генеральнай консульствотын өйөбүлүнэн “Мацури” Япония култууратын бэстибээлэ тэриллэр. Онно икэбанаҕа маастар-кылаастар, Япония артыыстарын кэнсиэрэ, бүлүүдэлэри амсайыы, киинэ бэстибээлэ, о.д.а. ыытыллаллара былааннанар.
Биһиги корр., “Саха сирэ”, edersaas.ru