Горнай улууһун Бэрдьигэстээх олохтоохторо Надежда, Валерий Ивановтар дьиэ кэргэн, сыллата Саҥа дьыл бырааһынньыгар дьоҥҥо үөрүүнү бэлэхтиир үгэстээхтэр. Быйыл даҕаны ити үтүө үгэстэрин тохтоппотулар.
Надежда Афанасьевна Горнайдааҕы роддомҥа акушерканан үлэлиир. Иллэҥ кэмигэр соҥҥо тиийэ көрүөхтэн эриэккэс таҥаһы-сабы баайар. Манна даҕатан эттэххэ, баайыыга сахалартан норуот бастакы маастара буолар. Ол эрээри, үлэттэн, дьарыктан быыс булан, Ивановтар кэлиҥҥи уонтан тахса сыл устата кырачааннарга Саҥа дьылга соһуччу үөрүүнү бэлэхтииллэр.
Биир даҕаны сылы көтүппэккэ поролонтон төбөҕө кэтэр улахан мааскалары – сыл бэлиэтин оҥороллор. Былырыыҥҥа диэри ону кэппитинэн алтаттан элбэх оҕолоох ыалга, оҕолору реабилитациялыыр кииҥҥэ минньигэс бэлэхтэри туттараллара, кырачааннарга аналлаах сурунаалларга, хаһыаттарга сурутуулары бэлэхтииллэрэ. “Быйыл хааччахтааһын киирэн, аҕыйах ыалга сырыттыбыт, сорохторго дьонноругар тиксэрдибит. Оҕолор барахсаттар маҥнай соһуйаллар, онтон үөрэллэр, устунан мэниктииллэр. Ону таһынан, Махтал күнүгэр – тохсунньу 11 күнүгэр, хамсык дьаҥыттан атахпытыгар туруорбут үрүҥ халааттаах аанньалларбытыгар махталбытын биллэрдибит. Киһини кыра даҕаны үтүө тыл, болҕомто үөрдэр”, — диэн ыал ийэтэ, медик идэлээх Надежда Афанасьевна санаатын үллэстэр. Маныаха оҕолору дьоллуур минньигэһи сэргэ, туох баарынан эти-үүтү эбэн, таарыйа төрөппүттэри эмиэ үөрдэллэр эбит. Быйыл бэйэлэрин илиилэрин сылааһынан ураты букеттары оҥорбуттар.
Итини таһынан, Надежда Афанасьевна кэллиэгэлэрин үөрдээри, биир үтүө күн үлэтигэр маскарааттаах тиийэн соһуппут. Хамсыгынан быйыл тэрилтэлэринэн туох даҕаны тэрээһин ыытыллыбатах, онон соһуччу үөрүү буолбут, хаартыскаҕа түспүттэр.
Тарбаҕар талааннаах Далбар Хотун өссө биир үгэстээх – Саҥа сылы көрсө, илиитигэр түһэрэн ылбыт, күн сирин саҥа көрдөрбүт кырачааннарыгар сыл бэлиэтин (символы) баайан уонна да атын өйдөбүнньүктэри бэлэхтиир. Быйыл тохсунньуга төрөөбүт алта кырачааҥҥа араас быһыылаах хаар кыырпахтарын (снежинка) бэлэх ууммут.
Манна барытыгар санааны саҕааччынан кыыһа Лена буолар. Ийэтин кытта сүбэлэрин холбоон, кыралыын-улаханныын бары түмсэ түһэн, араас маскарааттары, ураты оонньуурдары, киэргэллэри оҥорбутунан бараллар. Төрөппүттэрин, эбээлэрин-эһээлэрин көрө улааппыт сиэннэр эмиэ туспа дьоҕурдаах, талааннаах дьон араас куонкурустарга өрүү кытталлар, миэстэлэһэллэр. Ити курдук, айар талааннаах Ивановтар дьиэ кэргэн биир дойдулаахтарыгар сыллата үөрүүнү бэлэхтииллэр.
Людмила ПОПОВА, “Саха сирэ” хаһыат, edersaas.ru