Саха сирин олохтоохторо ДНР Кировскай куоракка шефскэй өйөбүлү оҥороллор.
— 1954 сыллаахха тэриллибит шахтердар олорор Кировскай куораттарыгар байыаннай дьайыы буолбатаҕа эрээри, олохтоохтор аҕыс сылы байыаннай балаһыанньаҕа олорбуттара. Бу, биллэн турар, куорат сайдыытыгар улахан охсууну аҕалбыта. Биһиги Кировскайы кытта бырааттыы сыһыаны олохтоон, кэккэ гуманитарнай өйөбүлү оҥоруохпут, — диэн Ил Дархан Айсен Николаев социальнай ситимнэргэ быһа эпииргэ бэлиэтээбитэ.
Донбасс шахтердарыгар Нерюнгри оройуонун «Эльгауголь» уонна «Колмар» чоҕу хостуур тэрилтэлэрэ баҕалаах дьон олоро, үлэлии кэлэллэригэр бэлэмнэрин биллэрбиттэрэ. Бу күннэргэ Кировскай куоракка «Донбасс шахтердарыгар Саха сирин Соҕуруу оройуонун шахтердарыттан» аһымал аахсыйа чэрчитинэн хомуллубут гуманитарнай көмөнү тиэммит массыыналар тиийдилэр.
Арассыыйа күнүгэр РФ Бэрэсидьиэнин иһинэн үлэлиир СӨ Бастайааннай бэрэстэбиитэлэ — бырабыыталыстыба бэрэссэдээтэлин бастакы солбуйааччы Андрей Федотов салайар дэлэгээссийэтэ Кировскай куорат олохтоохторугар Нерюнгри куораттан тиийбит гуманитарнай көмөнү тиксэрдэ.
Маныаха таһаҕаһы куруустааһыҥҥа уонна тиэрдиигэ волонтердар көхтөөхтүк көмөлөстүлэр.
Бу курдук араас хайысхалаах көмө Кировкайга салгыы оҥоһуллуоҕа.
Елена ПОТОЦКАЯ, «Саха сирэ» хаһыат.
Хаартыска — СИА-тан.