Дмитрий Давыдов саҥа киинэтин Москватааҕы киинэ бэстибээлигэр көрдөрүөхтэрэ

Режиссер Дмитрий Давыдов «Эдэр саас» диэн киинэтин бүгүн, балаҕан ыйын 1 күнүгэр, Москватааҕы киинэ бэстибээлигэр көрдөрүөхтэрэ. Саха сирин режиссерун киинэтэ бэстибээл сүрүн бырагырааматыгар киирэн куонкуруска кыттар.

Дмитрий Давыдов «Эдэр саас» киинэтин тохсунньуга 65 кыраадыс тымныыга икки нэдиэлэ кэриҥэ кэм иһигэр устубута. Киинэҕэ 40 саастах Василий диэн эр киһи сүүрбэччэ сыл улахан куоракка дьолун көрдүү сатаан баран төрөөбүт дойдутугар төннөрүн туһунан көстөр. Манна кэлэн кинини ким даҕаны күүппэтин, наадыйбатын өйдүүр. Киинэни былаһын тухары «Хардыы» рок-бөлөх ырыалара доҕуһуоллууллар.

Москватааҕы киинэ бэстибээлэ атырдьах ыйын 26 күнүттэн буола турар. Манна 65 дойдуттан 245 киинэ куонкуруска кыттар.