Нэдиэлэ ортотуттан саҕалаан, өрөспүүбүлүкэбит Ил Түмэнигэр дьэҥдьиир буолбутун, икки дьокутаакка холуобунай дьыала тэриллибитин туһунан хобдох сонуннар ыраас халлааҥҥа этиҥ эппитинии иһиллибиттэрэ.
Эрдэ иһитиннэрбиппит курдук, Ил Түмэн дьокутааттара Александр Уаровка уонна Дмитрий Саввиҥҥа РФ Силиэстийэлиир кэмитиэтин Саха сиринээҕи управлениетын салайааччыта Александр Заболиченко холуобунай дьыала тэрийбитэ. Дьокутааттар бөдөҥ кээмэйдээх бэриги ылыыга уорбаланаллар.
Дьыала СӨ ИДьМ-тын Экономическай куттал суох буолуутун уонна хоруупсуйаны утары үлэҕэ управлениетыттан уонна СӨ Борокуратууратыттан киирбит бэрэбиэркэлэр матырыйаалларыгар олоҕуран тэриллибитэ.
Бэҕэһээ, муус устар 27 күнүгэр, ол эбэтэр, соруйан оҥорбут курдук, Өрөспүүбүлүкэ күнүгэр, уорбаланааччыларга буруйдааһын тиксэриллэн, Дьокуускай куорат федеральнай суута кинилэргэ силиэстийэ кэмигэр хааччахтыыр миэрэ туһунан уураах таһаарбыт — бэс ыйын 25 күнүгэр диэри болдьоххо дьиэтээҕи хаайыыга олороллоругар.
Хайалара да буруйу билиммэтэхтэр.
Дьиэтээҕи хаайыыга олорон, төлөпүөнүнэн, интэриниэтинэн туһаналлара бобуллар, ханна да барыа суохтаахтар.
Биһиги корр., «Саха сирэ» хаһыат, edersaas.ru
Хаартыска: «Якутия 24»