Уопсастыба

Дмитрий Садовников Жатайга тутуулар хаамыыларын көрдө, Дьокуускайга паром үлэтин бэрэбиэркэлээтэ

Бүгүн, ыам ыйын 29 күнүгэр, СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников Дьокуускайга паром үлэтин тэрийиини, Жатайдааҕы судоверфь уонна канализационнай-ыраастыыр тутуулар хаамыыларын бэрэбиэркэлээтэ.

Паромунан туоруур сиргэ, Дьокуускай өттүгэр, 100 көлөнү түмэргэ, ол иһигэр 25 таһаҕас, 75 легковой массыынаны туруорарга үлэ ыытыллыбыт. Көлөлөрү салайарга анаан шлагбаумнар уонна хаххалар оҥоһуллубуттар. Көлөлөрү диспетчер сулууспата бэрээдэктиир, салайан биэрэр. Бүгүҥҥү күҥҥэ «Дьокуускай — Аллараа Бэстээх» сырыынан 8 паром үлэлиир. Бэс ыйын саҥатыттан, таһаҕастан тутулуга суох 10 паром 30 мүнүүтэнэн арыттаһан сылдьыаҕа.
Маныаха «Паромы Якутии» портал үлэлиир. Манна уҥуор туоратар туһунан иһитиннэриилэр, рейстэр араспысаанньалара, туоруур сыана баар буолаллар. Онон паромнар сырыыларын бириэмэнэн көрө олоруохха сөп. Дьокуускайга уонна Аллараа Бэстээххэ биэрэккэ сыстыыга видеокамералары туруораллар.
Бастакы вице-премьер паромунан туоратар сиргэ үлэни тэрийии сөптөөх хайысханан ыытыллан иһэрин бэлиэтээтэ.
Жатайдааҕы судоверфькэ билигин сири үүттээһин, сылааһынан, уунан хааччыйар уонна канализация ситимнэрин ыытарга атахтары туруоруу, уунан, гааһынан хааччыйыыга үлэлэрэ ыытылла тураллар. Бырабыыталыстыба бэрэссэдээтэлин бастакы солбуйааччы үлэни билсэн баран, тутуу тэтимэ ураты хонтуруолга сылдьарын, матырыйааллары аҕалыыга түмүктүүр түһүмэхтэр ыытылла туралларын тоһоҕолоото. Ураты болҕомто эбийиэккэ эбии үлэһиттэри тардыыга ууруллара бэлиэтэннэ.
Дмитрий Садовников, маны сэргэ, бөһүөлэккэ канализационнай-ыраастыыр тутууну саҥардан оҥоруу үлэтин билистэ. Саҥардыллыбыт аныгы ыстаансыйаны былаанынан 2021 сыл сэтинньи ыйыгар үлэҕэ киллэриллиэхтээх.
СӨ Бырабыыталыстыбатын бэрэссэдээтэлин бастакы солбуйааччы тутуу, матырыйааллары аҕалыы тэтимнээхтик баран иһэрин бэлиэтээтэ итиэннэ эбийиэктэр ыйыллыбыт болдьохторугар түмүктэнэллэригэр эрэнэрин биллэрдэ.
Андрей Сорокин (СИА) хаартыскаҕа түһэриилэрэ
0
0