Бэлиитикэ Нацбырайыактар Сүрүн

Дмитрий Садовников национальнай бырайыактары олоххо киллэрии тэтимин намтаппакка тутуһан иһэргэ ыҥырда



Дмитрий Садовников национальнай бырайыактары олоххо киллэрии ылыллыбыт тэтимин намтаппакка тутуһан иһэллэригэр ыҥырда.

Бүгүн, бэс ыйын 10 күнүгэр, СӨ Бырабыыталыстыбатын Бэрэссэдээтэлин бастакы солбуйааччы Дмитрий Садовников «Экология», «Олорор дьиэ уонна куорат эйгэтэ», «Куттала суох уонна хаачыстыбалаах суоллар»  национальнай бырайыактары олоххо киллэриигэ нэдиэлэ ахсын тэриллэр мунньаҕы ыытта.
Бастакы вице-премьер сүрүннээн толоруу таһымын сөптөөҕүнэн сыаналаата, ону тэҥэ тэтими намтаппакка тутуһан иһэргэ, оттон сорох хайысхаларга түргэтэтэн биэрэргэ ыҥырда.
СӨ Экология, айылҕаны туһаныы уонна ойуур хаһаайыстыбатын миниистирэ Сахамин Афанасьев кэпсээбитинэн, «Экология» национальнай бырайыакка «Ойууру харыстааһын» эрэгийиэннээҕи бырайыагынан, 2021 сылга тиэхиньикэни атыылаһыыга уонна ойууру чөлүгэр түһэриигэ бары көрдөрүүлэринэн үлэлэр болдьохторугар толоруллуохтара. Ойуур баһаарыгар үлэлииргэ анаан 39 көлө, ойуур баһаарыгар туттуллар 35 тэрил, тыа хаһаайыстыбатыгар туһаныллар түөрт тиэхиньикэ аҕалыллыбыт. Маны таһынан, баһаарга үлэлииргэ алта тиэхиньикэ, 10 тэрил, икки тыа хаһаайыстыбатыгар тиэхиньикэ,  биир оччо тэрил иһэллэр.
«Экология» бырайыакка «Ыраас дойду» эрэгийиэннээҕи бырайыагынан Кулаардааҕы көмүһү ылгыыр собуот хвостохранилищетын суох оҥорорго куонкурус докумуонугар уларытыылар киллэриллибиттэр. Бэс ыйын 9 күнүгэр саҥа куонкурус биллэриллибит. Толорооччу 30 күн иһинэн быһаарыллыахтаах, 10 күнүнэн үлэни толорорго судаарыстыбаннай хантараак түһэрсиллиэхтээх. Билигин бырайыак пааспарыгар уларытыылары киллэриигэ бырайыактыыр офиһы кытары үлэ ыытыллар.
СӨ Тырааныспар уонна суол хаһаайыстыбатын миниистирин бастакы солбуйааччы Сергей Владимиров «Куттала суох хаачыстыбалаах суоллар» национальнай бырайыагы олоххо киллэрии чэрчитинэн, 2021 сылга 264,41 км массыына суолун киллэрии былааннанарын, итинтэн 216,12 км — өрөспүүбүлүкэҕэ,  48, 29 км суол —  Дьокуускай куоракка буоларын бэлиэтээтэ. 24 эбийиэги кытары хантараак түһэрсиллибит. Бүгүҥҥү иһитиннэриинэн 20 эбийиэккэ үлэ ыытыллар: матырыйааллары аҕалыы, сири оҥоруу, быстах кэмҥэ атын сиринэн ааһар суолу тутуу. Манна 14 тэрилтэ, 170-тан тахса киһи үлэлиир, 150-тан тахса көлө туһаныллар. Бэс ыйын иккис аҥаарыттан, кыраапыгынын, хаалбыт түөрт эбийиэккэ үлэ саҕаланар.
Сергей Владимиров этэринэн, Дьокуускайга 36 эбийиэк быһаарыллыбыт, бу былырыыҥҥы көрдөрүүттэн икки төгүл элбэх. Билигин матырыйааллары аҕалыы, куоракка уулусса-суол ситимигэр 16 эбийиэккэ бэлэмнэнии үлэлэр ыытыллаллар. Аҕыс бэдэрээттээх тэрилтэ, 180-тан тахса киһи, 119 көлө үлэҕэ тардыллыбыт. Бэс ыйын иккис аҥаарыттан атын эбийиэктэргэ үлэлэр саҕаланаллар.
СӨ ОДьКХ уонна энергетикэ миниистирин солбуйааччы Дмитрий Шувалов «Экология» национальнай бырайыагынан «Кытаанах хомунаалынай бөҕү биир кэлимник харайыы» уонна «Олорор дьиэ уонна куорат эйгэтэ» национальнай бырайыагынан «Ыраас уу»  бырайыактары олоххо киллэрии хаамыытын сырдатта. Кытаанах хомунаалынай бөҕү харайыы үлэтэ тоҕус эбийиэгинэн ыытыллар. Бүгүҥҥү күҥҥэ Дьокуускайга наардааһыны оҥорор кытаанах хомунаалынай бөҕү харайар ыстаансыйаны уот ситимигэр холбооһун боппуруоһа быһаарыллар.
«Ыраас уу» эрэгийиэннээҕи бырайыагынан 2021 сылга Өлүөхүмэҕэ , Покровскайга, Горнай улууһугар Бэрдьигэстээххэ, Үөһээ Бүлүү улууһугар Үөһээ Бүлүү сэлиэнньэтигэр уонна Андреевскайга биэс бырайыак олоххо кииллэриллэр. Билиҥҥи туругунан, кыраапык быһыытынан эбийиэктэргэ тутар-монтажтыыр үлэлэр ыытыллаллар. Бэс ыйын 4 күнүгэр Бэрдьигэстээххэ (Горнай улууһа) тутар-монтажтыыр үлэ саҕаланыытын үөрүүлээх сиэрэ ыытыллыбыта.
0
0