Суолталаах Уопсастыба

Намҥа уу түһэн эрэр

Ыам ыйын 24 күнүгэр бырабыыталыстыба бэрэссэдээтэлин солбуйааччы Дмитрий Садовников Нам улууһугар баран, халаан уутуттан эмсэҕэлээбит нэһилиэктэргэ үлэ-хамнас хайдах тэриллибитин көрдө-иһиттэ.

Үөдэй нэһилиэгэр 32 дьиэ, 70-тан тахса тиэргэн ууга барбыт. Өрүс харбыт сиригэр дэлби тэптэриини оҥорон, бэҕэһээҥҥиттэн саҕалаан, уу түһэн эрэр. Сэлиэнньэ бүтүннүү ууга барыаҕын 2010 сыллаахха бэйэлэрэ туппут даамбалара быыһаабыт. Быйыл уу даамба бүтэр, намыһах сиринэн киирбит. Үөдэй нэһилиэгин баһылыгын э.т. Иван Гаврильев этэринэн, бу даамбаны салгыы тутарга үп көрүллүөн наада. Эбии 4,3 килэмиэтир тутуллуохтаах. Чахчыта, сыл аайы халаан содулун туоратыахтааҕар, даамбаны бөҕөргөппүт ордук.

Салгыы Дмитрий Садовников Граф биэрэгэ сэлиэнньэҕэ сырытта. Манна 2 дьиэ, 22 тиэргэн ууга барбыт. Бу кэнниттэн кини Нам улууһун баһылыга Юрий Слепцову кытары ыксаллаах быһыыга-майгыга хамыыһыйа мунньаҕын ыытта.

Нам улууһугар 8 нэһилиэккэ барыта 85 дьиэ, ол иһигэр 5 элбэх кыбартыыралаах дьиэ, 200-тэн тахса тиэргэн ууга барбыттар. Нэһилиэктэр баһылыктара суолу, уулуссалары чөлгө түһэрии уонна даамбаны бөҕөргөтөргө, тутарга ыытыллыбыт ороскуоту толуйуу боппуруостарын туруорустулар.

Баһылыктар ыйытыыларыгар тырааныспар, суол хаһаайыстыбатын миниистирин бастакы солбуйааччы Анатолий Потапов, “Госкомобж” бэрэссэдээтэлэ Дмитрий Лепчиков,халаан уутун содулун туоратыыга дирекция дириэктэрэ Гаврил Слободчиков, тыа хаһаайыстыбатын миниистирин солбуйааччы Прокопий Николаев хоруйдаатылар.

Мунньаҕы түмүктүүрүгэр Дмитрий Садовников улуус салалтатын, олохтоохторун кэмигэр ыытыллыбыт үлэ иһин махтанна. Халаан содулун туоратыыга бэриллэр үп-харчы кэмигэр кэлэригэр, ороскуоту суһаллык ааҕан-суоттаан биэрэллэригэр сорудахтаата.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru.

0
0
Telegram Whatsapp