Бэҕэһээ, ыам ыйын 19 күнүгэр, Өлүөнэ өрүскэ үөскээбит муус харыытын туоратар сыаллаах, Өлүөхүмэ улууһугар дэлби тэптэрии үлэлэрэ ыытыллыбыттара. Барыта 2,5 туонна дэлби тэбэр веществону туһанан икки сиринэн мууһу хамсаппыттара.
Оҥоһуллубут үлэ түмүктэрин туһунан Саха сирин Бырабыыталыстыбатын бэрэссэдээтэлин бастакы солбуйааччы Дмитрий Садовников кэпсээтэ.
Ол курдук, маҥнайгы дэлби тэптэрии киэһээ 17 чаас 50 мүнүүтэҕэ буолбут. Ити тухары уу таһыма үрдүү турбут, онон 20 чаас 50 мүнүүтэҕэ уу дамбаны тоҕо аспыт.
“Ол кэнниттэн 21.00 чааска иккис дэлби тэптэрии буолбута, ол эрэ кэнниттэн түүн 3.00 чааска муус хамсаабыта. Билигин кэтээн көрөрбүтүнэн, уу таһыма үс миэтэрэ кэриҥэ түстэ. Билигин Хоро иһиттэн уу олоччу барда. Билигин оҥоһуллубут хоромньу ааҕылла турар. Ууттан эмсэҕэлээбит дьоҥҥо көмө оҥоһуллуоҕа”, — диэтэ.
«Саха сирэ» хаһыат, edersaas.ru
Хаартыска sakha.gov.ru