Дмитрий Садовников: “Эриэйдэлэри күүһүрдүөххэ, ойуур баһаарын туругун олоччу хонтуруолга тутуохха”

Ааптар: 
Бөлөххө киир:

Бэҕэһээ, ыам ыйын 27 күнүгэр, Саха сирин сиригэр-уотугар ойуур баһаарын билиҥҥи туругун баһаартан ойууру харыстааһыҥҥа өрөспүүбүлүкэтээҕи штаб мунньаҕар бастакы вице-премьер Дмитрий Садовников салалтатынан көрүлүннэ.  

Билиҥҥи туругунан, ойуур уонна ландшафтнай баһаардар бэлиэтэммэтилэр. Баһаартан кутталлаах сезон саҕаланыаҕыттан ойуур 15 баһаара судаарыстыбаннай ойуур пуондатын 164,8 гектарыгар уонна 37 га иэннээх атын көрүҥнээх сирдэргэ тахсыбыта. Былырыын бу кэмҥэ 20 тыһыынча гектарга 91 баһаар турбута.

“Бу улахан үлэ түмүгэ. Быйыл биһиги түргэнник умулларыы тактикатын тутуһабыт – баһаары эбэтэр термическэй туочуканы суһаллык булуу уонна маны биир суукка устата умулларыы. Хонтуруолу уонна сэрэхтээх буолууну сымнатар табыллыбат”, — диэн Дмитрий Садовников бэлиэтээтэ.

Бастакы вице-премьер билигин өрөспүүбүлүкэ суһал күүстэрэ баһаары умуллара атын эрэгийиэҥҥэ быраҕыллыбыт – сүүстэн тахса сотрудник Иркутскай уобаласка ыытыллыбыт.

Андыны бултааһын сезона саҕаланан эрэр. Оройуоннар бары баһылыктарыгар нэһилиэнньэ ортотугар баһаары утары миэрэлэри тутуһалларыгар, өртөөһүнү ыыппаттарыгар инструктаж ыыталларыгар этилиннэ.

Оройуоннарга минерализованнай балаһалары оҥорууга уонна саҥардыыга үлэ ыытыллар. Дмитрий Садовников бу хайысхаҕа үлэни түргэтэргэ баһылыктарга эттэ. Нэһилиэнньэлээх пууннары ойуур баһаардарыттан көмүскээһин федеральнай таһымҥа тутуллар.

СӨ экологияҕа, айылҕаны туһаныыга уонна ойуур хаһаайыстыбатыгар миниистирэ Евгений Перфильев Судаарыстыбаннай Дуума ойуурга баһаартан куттал суох буолуутун кэһиигэ ыстараабы кытаатыннарыыны өйөөбүтүн иһитиннэрдэ. Ойуурга баһаартан куттал суох буолуутун быраабылатын кэһии иһин ортотунан 10 төгүл ыстараабы улаатыннарар сокуон барыла иккис ааҕыытын ааста.

Кураанах оту,  хаппыт мутугу  уонна да атын умайар матырыйааллары ойууртан чугас сир учаастактарыгар уматыы иһин ыстараабы гражданнарга – 10 төгүл, дуоһунастаах дьоҥҥо – 2,5 төгүл, юридическай сирэйдэргэ – 2 төгүл улаатыннарарга этилиннэ.

Баһаартан куттал суох буолуутун ирдэбиллэрин кэһэн, уот туруутугар уонна киһи доруобуйата айгырааһыныгар эбэтэр киһи өлүүтүгэр тиэрдии иһин юридическай сирэйдэргэ ыстараап 1 мөлүйүөнтэн 2 мөл солк. буолуоҕа эбэтэр 90 сууккаҕа үлэлэрин тохтотуохтара.

“Баһаар кэмэ саҥа саҕаланан эрэр. Онон ыһыктынар табыллыбат. Бэс ыйыгар үгүс маассабай тэрээһиннэр буолуохтара, ыһыахтар саҕаланаллар, андылыыллар. Онон эриэйдэлиир тэрээһиннэри күүһүрдэн, миэстэтигэр балаһыанньаны хонтуруолга тутуохха”, — диэн бастакы вице-премьер Дмитрий Садовников бэлиэтээтэ.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата

Мария Васильева түһэриитэ, СИА.

Бэлэмнээтэ Женни  Стрюкова

+1
0
+1
0
+1
0
+1
0
+1
0
+1
0
+1
0