Дмитрий Садовников: «Дьон түмсүүлээх, дьүккүөрдээх буолан, ойуур баһаара тохтотуллубута»

Ааптар: 
Бөлөххө киир:

СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников Чурапчы олохтоохторугар быйыл сайын ойуур баһаарын утары охсуһууга турунан көмөлөһүүлэрин, кыттыыларын иһин махтанна. Бастакы вице-премьер уоту утары охсуспут дьоҥҥо түөскэ кэтэр бэлиэни уонна махтал суруктары туттарда.

«Чурапчылар сомоҕолоһуулаахтарын көрдөрүлэр. Ону мин сайын манна кэлэ сылдьан өссө төгүл итэҕэйдим. Ойуур баһаарын умуруорууга хас иккис киһи: ОДьКХ үлэһититтэн саҕалаан, эдэркээн устудьуоннарга, бэйэлэрин баҕа өттүлэринэн көмөлөһөөччүлэргэ тиийэ турунан кытыннылар. Дьон түмсүүлээх, дьүккүөрдээх буоланнар, ыкса кэлбит уоттан сэлиэнньэлэри, алаастарбытын, сайылыктарбытын көмүскээбиппит«, — диир Садовников.
Дмитрий Садовников ойуур уотун умулларыыга үлэлээбиттэргэ түөскэ иилинэр анал бэлиэни уонна махтал суруктары туттарда. Наҕараадаламмыттар ортолоругар — бульдозердар машинистара, тырахтарыыстар, хачыгаардар, сылгыһыттар, учууталлар, уопсастыбаннай тэрилтэлэр, түмсүүлэр салайааччылара бааллар. Тэрийэр уонна хаһаайыстыбаннай боппуруостары быһаарыыга үлэлэспит, ойуур баһаарын умуруорууга сириэстибэлэри тиэрдиигэ үлэлэспит далбар хотуттар, кыргыттар эмиэ бэлиэтэннилэр. «Ойуур баһаарын умуруоруу кыттыылааҕа» бэлиэ «Дьулуур» автоледи холбоһук салайааччытыгар Ирина Кривошапкинаҕа туттарылынна.
Итинник өйдөбүнньүк бэлиэлэри Ил Дархан Айсен Николаев балаҕан ыйын 14 күнүгэр тутартаабыта. СӨ Ыччат уонна социальнай коммуникация министиэристибэтигэр чопчулаабыттарынан, 2021 сыл түмүктэниэр диэри, анал бэлиэни ойуур баһаарын умуруорууга бэйэлэрин баҕа өттүлэринэн көмөлөспүт 25 киһи тутуоҕа.
+1
0
+1
0
+1
0
+1
0
+1
0
+1
0
+1
0