Бу күннэртэн Саха Өрөспүүбүлүкэтин судаарыстыбаннай былааһын толорор уорганнарын үлэлэрин отчуота коронавирус дьаҥынан сибээстээн, онлайн эрэсииминэн ыытыллыаҕа.
Олунньу 5 күнүгэр, субуотаҕа, СӨ Бырабыыталыстыбатын бэрэссэдээтэлин солбуйааччы Дмитрий Садовников отчуоту оҥоруо. Быһа биэрии сарсыарда 9.45 чаастан «Саха» НКИХ уонна «Якутия 24» ханаалларга тахсыаҕа.
Дмитрий Садовников 2021 сылга инфраструктураны сайыннарыыга туох-ханнык үлэ ыытыллыбытын уонна инники өттүгэр туох былаан баарын билиһиннэриэҕэ, ону тэҥэ, Саха сирин олохтоохторун ыйытыыларыгар эппиэттиэҕэ.
Отчуокка ОДьКХ уонна энэргиэтикэҕэ миниистирэ Вячеслав Емельянов, тырааныспарга уонна суол хаһаайыстыбатыгар миниистирэ Владимир Сивцев, экологияҕа, айылҕаны туһаныыга уонна ойуур хаһаайыстыбатын миниистирэ Евгений Перфильев, нэһилиэнньэ олоҕор-дьаһаҕар куттал суох буолуутун хааччыйыыга судаарыстыбаннай кэмитиэт бэрэссэдээтэлэ Дмитрий Лепчиков, сыана бэлиитикэтигэр судаарыстыбаннай кэмитиэт бэрэссэдээтэлэ Антонина Винокурова, судаарыстыбаннай тутууга уонна олох-дьаһах надзорун управлениетын салайааччы Павел Аргунов кыттыахтара.
Быһа эпиир кэмигэр ыйытыылары 8 (4112) 320111 диэн элбэх ханааллаах нүөмэргэ эрийэн биэриэххитин сөп. Ону тэҥэ, олунньу 5 күнүттэн +7 (4112) 51-00-21 нүөмэргэ эрийэн, “саҥарар” ассистент (робот-оператор) көмөтүнэн эмиэ биэрэр толору бырааптааххыт. Итини таһынан, yakutia.click. порталга ыытыаххытын сөп. Саха Өрөспүүбүлүкэтин судаарыстыбаннай былааһын толорор уорганнарын үлэлэрин отчуота «Тэтим” араадьыйанан уонна «Саха» НКИХ ютуб-канаалынан эмиэ бэриллиэҕэ. Отчуот кыраапыгын https://www.sakha.gov.ru/news/front/view/id/3301456 диэҥҥэ киирэн билсиэххитин сөп.